एनआईसी एसिया बैंकको ह्याकिङ प्रकरण, सिआईवी र राष्ट्र बैंकलाई मिलाउन करोडौंको चलखेल

 

एनआइसी एसिया बैंकमा १ बर्षअघि घटेको ह्याकिङ प्रकरणका धेरै नखुलेका पाटाहरु खुल्न थालेका छन् । २०७४ कार्तिकमा बैंकको सिस्टममा ह्याक गरी करोडौं रकम विदेशमा झिकिएपछि बैंकभित्र विवाद निम्त्याएको थियो । बैंक कर्मचारी तथा व्यवस्थापन पक्षको चरम लापरबाहीले ह्याकिङ भएको स्वयम् बैंकले नै तयार पारेको प्रतिवेदनमा उल्लेख थियो ।

 

स्रोतका अनुसार ह्याकिङ प्रकरणपछि नेपाल प्रहरीको केन्द्रीय अनुसन्धान ब्युरो (सिआइबी)ले छानबिन सुरु गरे । छानबिनमा बैंक दोषी देखिएपछि नेपाल राष्ट्र बैंकलाई सेटिङ मिलाई गल्ती ढाकछोप गरी आफू अनुकूल प्रतिवेदन तयार पार्न बैंक व्यवस्थापनको नेतृत्वले ठूलो रकम खर्च गरेको कुरा अहिले उठेपछि विवाद बल्झिएको हो ।

 

बैंकका अध्यक्ष तुल्सीराम अग्रवालको समूहले सिआईबी र राष्ट्र बैंकमा सेटिङ मिलाउनका लागि बोर्ड सदस्य राजेन्द्र अर्याललाई जिम्मा लगाएका थिए । तिनै सदस्यले सिआईबी र राष्ट्र बैंकलाई मिलाउने नाममा करोडौं रकम बैंकबाट निकालेको बैंक स्रोत बताउँछ ।

 

अर्याल र सीआइबीका तत्कालीन प्रमुख डीआइजी पुस्कर कार्की बालुवाटारस्थित सेतो दरबार रेष्टुरेन्टमा बसी ह्याकिङ प्रकरण मिलाउन बैंकका अध्यक्ष तुलसीराम अग्रवालहरुसँग रकम मोलमोलाई गरेका थिए । र, सीआइबीमा बयान दिइरहेका तुल्सीराम अग्रवालको समूहलाई अर्यालले प्रहरी मिलाउन भनेर १० करोडको लेनदेन गरेको स्रोत बताउँछ ।

 

त्यसमा सीआइबीका कार्कीलाई ७ करोड दिएर अरु अर्यालले चप्काएका थिए । बैंकको भर्खरै सम्पन्न साधारणसभामा उक्त खर्चको बारेमा कुरा उठेपछि अग्रवालको समूहले जवाफ दिन सकेको थिएन ।  अर्कोतिर बैंकभित्रको कमजोरीलाई लुकाउन अग्रवालको समूहले नाटकीय रुपमा भारतबाट केपीएमजी कम्पनीको टिम झिकाएर ठूलो रकम खर्च गरेको थियो । स्रोतका अनुसार केपीएमजीले बुझाएको प्रतिवेदनमा घटनामा बैंक कर्मचारी र व्यवस्थापनलाई चोख्याएर बैंकको साइबर सुरक्षामा प्रश्न उठाइएको थियो ।

 

हालका एआईजी पुष्कर कार्की सिआईबीमा प्रमुख छँदा सेटिङ मिलेपछि सोही प्रतिवेदनको आधारमा विदेशी बैंकमा रहेका ८ देशका १३ खातावालालाई विपक्षी बनाई पाटन उच्च अदालतमा सरकारवादी मुद्दा दर्ता भएको थियो । तर, बैंकको व्यवस्थापन पक्ष र कुनै पनि कर्मचारीलाई भने सामान्य बयानमात्र लिई मुद्दा नचलाई छाडिएको थियो ।

 

यसैमा कार्की र बैंक व्यवस्थापनको ठूलो स्वार्थ लुकेको र राजेन्द्र अर्याललले सेटिङ मिलाएको एनआईसी बैंक स्रोतको दावी छ ।  त्यतिखेर निष्पक्ष रुपमा छानविन हुनुपर्छ भनेर माग गर्ने केही कर्मचारीलाई बैंकले सूचना लिक हुने डरले उल्टै जागिरबाट हटाएको थियो । केपीएमजीको रिपोर्टलाई आधार मान्ने हो भने एनआइसी एशिया बैंकका कर्मचारी र व्यवस्थापनलाई सर्वसाधरणको अरबौं निक्षेपमा खेलवाड गरेको स्पष्ट देखिन्छ ।

 

उक्त ह्याकिङ प्रकरणमा मोहन रञ्जित, प्रद्युम्न नेपाली र प्रतिना प्रधानको युजर आइडी र पासवर्ड प्रयोगगरी ३१ वटा स्विफ्ट म्यासेजमार्फत् बैंकको ४६ करोड ५६ लाख ५० हजार ५ सय ५ रुपैयाँ रकमान्तर भएको थियो । एनआइसी एशिया बैंकको ह्याकिङका बारेमा सीआइबीले पुनः अनुसन्धान गरी बैंकको ब्यवस्थापनमाथि कारबाही गर्नुपर्ने आवाज पनि उठेको छ । स्रोतका अनुसार सीआइबीले निष्पक्ष रुपमा छानबिन गर्ने हो भने एनआइसी बैंकको अपराध कर्म खुल्नेछ ।

 

यतिसम्मकी बैंक ह्याकिङ हुनु केही दिनअघि नै बैंकमा प्रयोग हुने सबै इमेलहरुमा आक्रमण भएको थियो । तर, बैंकको व्यबस्थापन पक्षले समयमै सूचना पाउँदा पनि अनुसन्धान नगरी चरम लापरवाही गरेपछि व्यवस्थापन पक्ष शंकाको घेरामा परेको थियो । सिआईवीका तत्कालीन प्रमुख कार्की र बैंकका संचालक राजेन्द्र अर्यालको डिजाइनमा बैंकको व्यवस्थापन र कर्मचारीलाई अनुसन्धानको दायरामा ल्याएजस्तो गरी उल्टै उनीहरुको कमजोरी लुकाउन भूमिका खेलेका कारण घटना शंकास्पद बनेको थियो ।