चिसोको पारो बढ्दैछ, वर्षा पनि हुँदैछ, जान्नुस् तीन दिनको मौसमी अवस्था
यस वर्षको काठमाडौं उपत्यकाको न्यूनतम तापक्रम सोमबार शून्य डिग्रीमा झरिसकेको छ । त्यो क्रम अझै बढ्ने चेतावनी मौसमविद्हरुले दिएका छन् ।
आइतबारको तुलनामा सोमबार न्यूनतम तापक्रम घट्दै जाँदा त्यो क्रमले निरन्तरता पाउने भन्दै मौसमविद्हरुले सचेत हुन आग्रह गरेका छन् । सोमबार काठमाडौँको न्यूनतम तापक्रम ० दशमलव ५ डिग्री सेल्सियसमा झरेको छ ।
आइतबार काठमाडौँको न्यूनतम तापक्रम १ दशमलव ० डिग्री सेल्सियस थियो । अब केही दिन काठमाडौँको न्यूनतम तापक्रम ० देखि ३ को हाराहारीमा रहने मौसम पूर्वनुमान महाशाखाले जनाएको छ ।
तापक्रम निरन्तर घट्दै गयो भने काठमाडौँको तापक्रम केही दिनमै माइनसमा झर्न सक्ने मौसम पूर्वानुमान महाशाखाले जनाएको छ ।
चिसो अझै बढ्दै जाँदा मुलुकका अन्य क्षेत्रको न्यूनतम तापक्रम पनि घट्दै गएको छ । महाशाखाको पछिल्लो विवरणानुसार डडेल्धुरा, धनकुटा, नेपालगञ्ज, सिमरा र पोखराको तापक्रम ४ डिग्री सेल्सियस मापन गरिएको छ ।
त्यस्तै जिरी, जोमसोम र जुम्लाको तापक्रम माइनसमा झरेको छ । महाशाखाका अनुसार धरानको न्यूनतम तापक्रम ११ दशमलव ४ डिग्री सेल्सियस अधिकतम २४ दशमलव ५ डिग्री सेल्सियस रहेको छ ।
मौसम पूर्वानुमान महाशाखाले दिएको जानकारी अनुसार यस्तो त तीन दिनको मौसम पूर्वानुमान
पुस १७ गते (मंगलबार)
दिउँसो – देशभरिनै मौसम सामान्यतया सफा रहेता पनि पश्चिमी पहाडी भेगमा आंशिकदेखि सामान्य बदली हुने संभावना छ ।
राति – पहाडी भेगमा आंशिकदेखि सामान्य बदली रही बांकी भूभागमा आंशिक बदलीको अवस्था रहने छ भने पश्चिमी पहाडी भूभागको एक–दुई स्थानमा हल्का वर्षा हुने सम्भावना छ । साथै पश्चिमी उच्च हिमाली भूभागका एक–दुई स्थानमा हल्का हिमपात पनि हुने सम्भावना छ ।
पुस १८ गते (बुधबार)
दिउँसो – देशको पश्चिम भूभाग तथा मध्य र पूर्वका पहाडी भेगमा सामान्य बदली रही बांकी भूभागमा आंशिक बदलीको अवस्था रहने छ। देशको पश्चिम तथा मध्य क्षेत्रका पहाडी भूभागगका एक(दुई स्थानहरुमा हल्का वर्षा हुने सम्भावना छ । साथै उच्च हिमाली भूभागका केही स्थानहरुमा हल्का हिमपात पनि हुने सम्भावना छ ।
राति – देशको पश्चिम भूभाग तथा मध्य र पूर्वका पहाडी भेगमा सामान्य बदली रही बांकी भूभागमा आंशिक बदलीको अवस्था रहने छ अनि पश्चिमका थोरै तथा मध्य र पूर्वी क्षेत्रका पहाडी भूभागगका एकदुई स्थानहरुमा हल्का वर्षा हुने सम्भावना छ । साथै उच्च पहाडी तथा हिमाली भूभागमा हल्का हिमपात हुने सम्भावना छ ।
पुस १९ गते (बिहीबार)
दिउँसो – देशको पश्चिम भूभाग तथा मध्य र पूर्वका पहाडी भेगमा सामान्य बदली रही बांकी भूभागमा मौसम सफा नै रहने देखिन्छ। देशको पश्चिम तथा मध्य क्षेत्रका पहाडी भूभागका थोरै स्थानहरुमा हल्का वर्षा हुने सम्भावना छ । साथै उच्च हिमाली भूभागका केही स्थानहरुमा हल्का हिमपात पनि हुने सम्भावना छ ।
राति – देशको पहाडी भूभागमा आंशिकदेखि सामान्य बदली रही बांकी भूभागमा मौसम सफा नै रहने देखिन्न्छ र उच्च पहाडी तथा हिमाली भूभागमा हल्का हिमपात हुने सम्भावना छ ।
