एकीकरणलाई अन्तिमरुप दिन ९ सदस्य कार्यदल गठन, जनार्दन शर्मा कार्यदलमा अटेनन्
नेकपा स्थायी कमिटीको बैठकले एकीकरणका बाँकी कार्यभार पुरा गर्न ९ सदस्यीय कार्यदल गठन गरेको छ । पुस मसान्तसम्म एकीकरणको काम सक्ने गरी बैठकले कार्यदल गठन गरेको प्रबक्ता नारायणकाजी श्रेष्ठले बताए ।
एकीकरणको कामलाई अन्तिमरुप दिन महासचिव बिष्णु पौडेल, गृहमन्त्री रामबहादुर थापा, शंकर पोखरेल, वर्षमान पुन, योगेश भट्टराई, लेखराज भट्ट, सुरेन्द्र पाण्डे, वेदुराम भुसाल, रघुवीर महासेठ रहेको कार्यदल गठन गरेको छ ।
कार्यदलले पुस मसान्तभन्दा पहिले नै आफ्नो प्रतिवेदन बुझाउने भएको छ । कार्यदलले प्रतिवेदन बुझाएपछि सचिवालयमा छलफल हुने र त्यसपछि स्थायी कमिटीमा लिएर पारित गर्ने प्रवक्ता नारायणकाजी श्रेष्ठले बताए ।
यही महिनाभित्र फेरी स्थायी कमिटीको बैठक बस्ने भएको छ । कार्यदलले सिफारिस गरेका आधारमा जिल्ला, नगर, गाउँ कमिटी र जनबर्गाीय संगठनको एकीकरण हुने भएको छ । कार्यदलमा पूर्व एमालेबाट ६ र माओवादी केन्द्रबाट तीन नेता रहेका छन् ।
कार्यदलबाट जनार्दन शर्मा फुत्किए
कार्यदलमा जनार्दन शर्माको नाम पनि प्रस्तावित गरिएको थियो । तर उनी बैठक अबधिभर अमेरिकामा भएका कारण उनको नाम समावेश नभएको एक स्थायी कमिटी सदस्यले बताए । कार्यदलमा सवै प्रदेशबाट प्रतिनिधित्व गराइएको छ । तर कर्णाली प्रदेशका इन्चार्ज समेत रहेका शर्मा भने कार्यदलमा अट्न सकेनन् । उनी पारिवारिक कामको सिलसिलामा अमेरिकामा छन् ।
