इन्काउन्टर गर्ने प्रहरी हुँ भन्दै १ करोडभन्दा बढी ठगी गर्ने पक्राउ
‘म प्रहरी हुँ तर ड्रेस लगाउँदिन । सिभिलमा हिँड्छु, इन्काउन्टर गर्ने काम गर्छु,’ यो जीवन गुरुङको परिचयसँगै डर पैदा गर्ने तरिका थियो । प्रहरीका अनुसार त्यतिमात्रै होइन मोबाइलमा प्रहरीले बोक्ने वाकीटकीमा आउने आवाजजस्तै सेट गर्ने र बेला–बेलामा प्रहरी भएको भ्रम दिने कोशिस पनि गर्थे ।
प्रहरी हो भन्ने भ्रम छर्ने, सुरुमा प्रभावित पार्ने गरी परिचय गर्ने र विभिन्न बाहनामा पैसा मागेर फिर्ता मागे फेरि डर देखाउने जीवनको तरिका थियो । लमजुङ मर्स्याङ्दी गाउँपालिका–१ का २८ वर्षीय जीवनको ठगी गर्ने यो तरिका त्यतिञ्जेलसम्म चल्यो, जतिञ्जेल प्रहरीले पत्ता लगाएन ।
पोखरा र आसपासका व्यावसायीलाई प्रहरीको हवाला दिएर रकम असुली गरेको आरोपमा प्रक्राउ परी अहिले जीवन जिल्ला प्रहरी कार्यालय कास्कीको हिरासतमा छन् । जीवन समातिएपछि आफू ठगिएको भन्दै उजुरी गर्न आउनेहरु थुप्रै छन् । पोखरा–१० रामबजारको गुमान गुरुङले जीवनले ७ लाख रुपैयाँ ठगी गरेको भन्दै प्रहरी कार्यालयमा उजुरी गरेका छन् ।
स्याङ्जाका कुमबहादुर गुरुङसँग २६ लाख रुपैयाँ ठगेको भन्दै प्रहरीकोमा गुनासो पुगेको छ । जीवनले गुरुङलाई निजी गाडी किन्न सहयोग गर्ने बताउँदै ठगी गरेका थिए । गाडी खरिद गरिदिने बताउँदै जीवनले सुरुमा २२ लाख रुपैयाँ र पछि ४ लाख ५० हजार रुपैयाँ आइएमईमार्फत मगाएका थिए ।
५५ लाख रुपैयाँ पर्ने गाडी खरिद गर्न भन्दै पैसा मगाएका जीवन कुमबहादुरसँग साउनदेखि नै टाढा हुन थालेका थिए । उनले कहिले फोन नउठाउने कहिले उठाएर उल्टै धम्क्याउने गर्थे ।
बुधबार कुमबहादुरले फेरि नक्कली प्रहरी जीवनलाई फोन गरे तर फोन सक्कली जीवनले होइन प्रहरीले उठायो । तबमात्रै कुमबहादुर झस्किए, उनी आफू ठगिएको पक्का भयो र आफूमात्रै होइन ठगिनेमा धेरै जना रहेछन् ।
जिल्ला प्रहरी कार्यालय कास्कीमा अहिले ३२ जना यस्ता व्यक्तिले आफू जीवनबाट गठिएको भन्दै उजुरी दिएका छन् । उजुरी गर्न आउने क्रम जारी रहेकाले लाखौं रुपैयाँ ठगेको हुनसक्ने कास्की प्रहरी प्रमसख एसपी ओम रानाले बताए ।
पहिले पैसा माग्ने र फिर्ता माग्नेलाई आफू जिल्ला प्रहरी कार्यालयमा कार्यरत असई हो भन्दै थर्काएको जीवनले प्रहरीलाई बयान दिएका छन् । आफू इन्काउन्टर गर्ने प्रहरी बताउँदै जीवनले पैसा असुली गरेका थिए ।
प्रहरीका अनुसार जीवनले पहिलो, दोस्रो पटककै भेटमा मान्छेसँग सम्बन्ध निर्माण गरी प्रभावित पार्ने र त्यसपछि विभिन्न बाहानामा पैसा माग्ने गर्थे । पैसा लिइसकेपछि फिर्ता मागे उल्टै थर्काउने गरेको गुनासो पीडितहरुको छ ।
जीवनलाई ठगी मुद्दा दर्ता गरी थप अनुसन्धान भइरहेको प्रहरीले जनाएको छ । जीवनले पोखराका दोहोरी साँझ र विभिन्न होटलमा जाने टन्न खाने र प्रहरी हुँ भन्दै पैसा नतरी हिँड्ने गरेको गुनासो लिएर प्रहरी कार्यालय पुगिरहेका छन् ।
जीवनले पोखरा र आसपासका विभिन्न व्यवसायीलाई ठगेको प्रहरीको भनाइ छ । जीवनले १ करोडभन्दा बढी रकम ठगी गरेको अनुमान प्रहरीको छ ।
