पारिवारिक कथामा मिना ढकालले फिल्म बनाउने
हास्यव्यंग्य कलाकार मनोज गजुरेलसँग डिभोर्स गरेको वार्षिक उत्सव मनाउँदै मिना ढकालले फिल्म निर्माण गर्ने घोषणा गरेकी छन् ।
उनले यो वार्षिक उत्सवलाई स्वतन्त्र दिवसको रुपमा समेत लिएका बताइन् ।
बुधबार नयाँ बानेश्वरको बुटिकमा पहिलो डिभोर्स उत्सव मनाउँदै मिनाले एक वर्ष भित्र पारिवारिक तथा सामाजिक कथामा फिल्म निर्माण गर्ने बताइन् ।
उनले भनिन्, ‘फिल्मको कन्सेप्ट मेरो हो ।
फिल्मको स्क्रिप्ट तयार गर्ने जिम्मा मैंले अभियुद्ध खनाललाई दिएको छु ।
मैले अरुलाई देखाउन काम गरेको होइन ।
मैंले आत्म सन्तुष्टिको लागि गरेको हो ।’
उनले फिल्ममा आफ्नो अभिनय रहने पनि बताएकी छन् ।
‘आफ्नो फिल्ममा सानै भुमिका भएपनि गर्छु तर अरुको फिल्ममा सानो तिनो भुमिकामा गर्दिंन’, उनले भनिन् ।
डिभोर्स अगाडिसम्म गुमनाम रहेकी मिना डिभोर्सपछि अन्तरवार्ता र गीत सार्वजनिक गरेर चर्चामा छिन् ।
उनले डिभोर्स अगाडी गुमनाम रहनुमा पुर्व पति मनोज गजुरेलले रोक तोक गरेको आरोप लगाइन् ।
उनले भनिन, ‘मनोज गजुरेललाई मैंले नै डोराएर उचाईको शिखरमा पुराएको हो ।
मनोज गजुरेललाई मेरो क्षमता थाहा छ ।
थाहा भएरै उहाँले मलाई बाहिर आउन नदिनु भएको हो ।
उहाँलाई म भन्दा अगाडी जान्छे भन्ने डर थियो ।’
