मानव तस्करीमा लागेका लक्की शेर्पाको राजदूत पद धरापमा
अष्ट्रेलियाका लागि नेपाली राजदूत लक्की शेर्पा राजदूत पद धरापमा परेकाे छ । आर्थिक तथा कुटनीतिक मर्यादाविपरित गतिविधि गरेको भन्दै सरकारले राजदूत शेर्पाबारे छानविन गर्न गठित छानविन समितिले शेर्पालाई राजदूतमा निरन्तरता दिन नहुने ठहरसहितको प्रतिवेदन परराष्ट्रमन्त्री प्रदीपकुमार ज्ञवालीलाई बुझाइसकेको छ ।
परराष्ट्र मन्त्रालयका अनुसार मन्त्री ज्ञवालीले हाल उक्त प्रतिवेदन अध्ययन गरिरहेको बताइएको छ । यसअघि राजदूत शेर्पा विवादमा तानिएपछि सरकारले उनलाई स्पष्टिकरण दिन नेपाल बोलाएको थियो ।
छानविन समितिका एक सदस्यका अनुसार छानविनका क्रममा राजदूत शेर्पाले आर्थिक तथा कुटनीतिक मर्यादाविपरित अनियमितता र पदको दुरुपयोग गरेको पाइएको छ ।
ती सदस्यका अनुसार अष्टे्लियामात्रै नभएर भविष्यमा अरु कुनैपनि देशको राजदूत हुन समेत शेर्पा अयोग्य ठहरिएको छानविनका क्रममा भेटिएको छ ।
‘अष्ट्रेलियामात्रै होइन शेर्पा अव कुनैपनि देशको राजदूत हुन योग्य हुने छैनन् । उनीबारे समितिले गहन छानविन गरेर प्रतिवेदन बुझाइसकेको छ’ ती सदस्यले रातोपाटीसँग भने ।
परराष्ट्र मन्त्रालयले प्रशासन महाशाखा प्रमुख मणि भट्टराई, अस्ट्रेलियासमेत हेर्ने महाशाखा प्रमुख तापास अधिकारी र शिष्टाचार महापाल दीपक अधिकारी सम्मिलित तीन सदस्यीय छानविन टोली गठन गरेर अध्ययन प्रतिवेदन तयार गरेको हो ।
गत आइतबार पत्रकार सम्मेलन गर्दै परराष्ट्रमन्त्री प्रदीप ज्ञवालीले मानव तस्करी तथा श्रम शोषणको आरोप लागेकी राजदूत शेर्पाको छानविन अन्तिम चरणमा पुगेको बताएका थिए । परराष्ट्रमन्त्री ज्ञवालीले विवादमा मुछिएकी राजदूत शेर्पाबारेको छानविन अन्तिम चरणमा पुगेको भन्दै प्रतिवेदनका आधारमा सरकार अघि बढ्ने बताएका थिए ।
के हो शेर्पामाथिको आरोप ?
शेर्पामाथि गम्भीर आरोप लागेपछि उनी मंसिर २३ गते नेपाल आएर छानविन समितिलाई स्पष्टिकरण पनि दिइसकेकी छन् । तर उनको स्पष्टिकरण चित्तबुझ्दो नभएको समितिको निष्कर्ष छ ।
राजदूत शेर्पामाथि उनकै सवारी चालक वाङ्छु शेर्पाले मानव तस्करी तथा श्रम शोषण गरेको आरोप लगाउदै उजुरी दिएका थिए ।
वाङ्छुले राजदूत शेर्पा र उनका श्रीमान् न्वाङ्ग सोनाम शेर्पा मानव बेचबिखनमा संलग्न रहेको किटानी गरेका थिए ।
राजदूत शेर्पाका श्रीमानले वाङ्छुसँग करिब ३३ लाख रुपैयाँ लिएर अस्ट्रेलिया लगेको तथा अरु केही मानिसहरुलाई समेत अस्ट्रेलिया लैजान पहल गर्ने भन्दै रकम उठाएको सवारी चालक वाङ्छुको भनाई छ ।
लक्कीको शक्ति केन्द्रमा दौडधूप
अनियमितता तथा पदको दुरुपयोग गरेको आरोप लागेपछि पद जोगाउन राजदूत शेर्पाले विभिन्न शक्तिकेन्द्रमा दौडधूप चलाएकी छन् । स्रोतका अनुसार उनले नेकपाका अध्यक्ष पुष्पकमल दाहाल ‘प्रचण्ड’ अर्का अध्यक्ष तथा प्रधानमन्त्री केपी ओली लगायतलाई भेटेर शेर्पाले जोगाइदिन दवाव दिइरहेकी छन् ।
