बिग बासमा चम्किँदै सन्दीप, दोस्रो खेलमा लिए ३ विकेट
अष्ट्रेलियाको चर्चित टी-ट्वान्टी क्रिकेट प्रतियोगिता बिग बास लिग अन्तर्गत आफ्नो दोस्रो खेलमा सन्दीप लामिछानेले ३ विकेट हात पारेका छन् ।
होबर्ट हुरिकेन्सविरुद्धको खेलमा सन्दीपले कप्तान म्याथु वेडसहित ३ ब्याट्सम्यानलाई पेबेलियनको बाटो देखाएका हुन् । ४ ओभर बलिङ गर्ने क्रममा सन्दीपले २४ रन खर्चिए ।
आफ्नो पहिलो ओभरमा एलेक्स डूलनको विकेट लिएका सन्दीपले तेस्रो ओभरमा कप्तान म्याथु वेडलाई आउट गरे । अर्धशतकीय पारी खेलेका वेडलाई सन्दीपले अर्का स्पीनर एडम जम्पाको हातबाट क्याच गराएका हुन् ।
आफ्नो स्पेलको अन्तिम ओभरको पहिलो बलमा बेन मकडर्मोटलाई एलबीडब्लू धरापमा पार्दै सन्दीपले समग्र प्रतियोगितामा पाचौं विकेट हात पारे ।
यसअघि सिड्नी थण्डरसँगको पहिलो खेलमा सन्दीपले २ विकेट लिएका थिए । उक्त खेलमा सन्दीपको टीम मेलबर्न स्टार्स पराजित भएको थियो ।
