मण्डलामा समलिंगी ‘साथीको कथा’
मण्डला थिएटरमा ‘साथीको कथा’ नामक नाटक मञ्चन भइरहेको छ ।
समलंैगिकताको विषयमा केन्द्रित नाटक पुस ६ गते शुक्रबारबाट मञ्चन सुरु भएको छ । यो नाटक मण्डलामा पुस २२ गतेसम्म मञ्चन हुनेछ ।
भारतीय नाटककार विजय तेन्दुलकरको मित्राची गोष्टको नेपाली अनुवाद नाटकले समलिगीं किशोरीले आफ्नो प्रेम प्राप्त गर्न भोग्नु परेको कष्ट चित्रण गरेको छ ।
नाटककी मुख्य पात्र सुमित्राले प्रेम गर्ने युवती नमाको पुरुष प्रेमिले उनीहरु दुईको प्रेममा सिर्जना गर्ने व्यवधानको माध्यमबाट नाटकले सामाजिक यथार्थ चित्रण गर्ने प्रयास गरेको छ ।
यस बाहेक सुमिलाई एकोहोरो प्रेम गरिरहेको पाण्डुले सुमि समलिंगी हो भन्ने थाह पाएपछिको कारुणीक अवस्था नाटकमा देखाइएको छ ।
नेपाली समाजमा अझै पनि धेरैजसो यौनिक अलपसंख्यक समुदायले समाजबाट बहिष्कृत हुने गरेको छ । यहि तथ्य उजागर गर्दै नाटकले यौनिक अल्पसंख्यकले सामाजिक बहिष्कार सहनुपर्दाको अवस्थालाई पनि सुमीको माध्यमबाट प्रस्तुत गरेको छ ।
रेनुका कार्कीको परिकल्पना तथा निर्देशन रहेको नाटक सागर चन्दले अनुवाद गरेका हुन् ।
नाटकमा आयुष्मान प्याकुरेल, अनिल सुब्बा, सूर्यमान लिम्बु, शारदा अधिकारी र सुस्मा निरौला लगायत कलाकारहरुको अभिनय रहेको छ ।
