समायोजन अध्यादेशविरुद्ध आन्दोलन चर्काउने निजामति कर्मचारीको चेतावनी
कर्मचारी समायोजन अध्यादेशको विरोधमा सिंहदरवारभित्रै प्रदर्शन गरेका निजामति कर्मचारीहरुले थप संघर्षका कार्यक्रम घोषणा गर्ने तयारी गरेका छन् ।
संघर्षका कार्यक्रम घोषणा गर्न बिहीबार दिउँसो कर्मचारी संघठनको बैठक बस्न लागेको नेपाल निजामति कर्मचारी संगठनका महासचिव रेवन्त गौतमले बताए ।
अध्यादेशकको विरोधमा उनीहरुले बुधबार प्रधानमन्त्री तथा मन्त्रिपरिषदको कार्यालय र संघीय मामिला तथा सामान्य प्रशासन मन्त्रालय घेराउ गरेका थिए ।
सरकारले ल्याएको कर्मचारी समायोजन अध्यादेश विभेदकारी भएको उनीहरुको भनाई छ ।समायोजन अध्यादेशले बरिष्ठ कर्मचारी संघमै बस्ने कनिष्ठहरू स्थानीय तह वा प्रदेशमा खटिने व्यवस्था गरेकाले खटिएर जाने कर्मचारीलाई फेरि संघमा फर्कने बाटो बन्द गरिएकले संघर्ष गर्नुपरेको महासचिव गौतमको भनाई छ ।
कर्मचारी समायोजन स्वेच्छिक बनाउनु पर्ने उनीहरूको भनाइ छ । ‘हिजो संकेतस्वरुप सिंहदरवारमा प्रदर्शन गरिएको हो । थप कार्यक्रम घोषणा गर्न आज २ बजे सिंहदरवारमा बैठक बस्दैछ । त्यसपछि कस्ता कार्यक्रम घोषणा गर्ने भन्ने तय गरिन्छ’ महासचिव गौतमले रातोपाटीलाई बताए ।
गत मङ्सिर २३ गते राष्ट्रपति विद्यादेवी भण्डारीले जारी गरेको कर्मचारी समायोजन सम्बन्धमा व्यवस्था गर्न बनेको अध्यादेश, २०७५ को विरोधमा कर्मचारीहरु आन्दोलित भएका हुन् ।
यो अध्यादेशले सहसचिव भन्दा तलका कर्मचारीलाई सरुवा बढुवा लगायतमा असर पर्ने कर्मचारीहरुको दावी छ । लामो समयदेखि कर्मचारीहरु सरकारले खटाएको स्थानमा जान नमान्दा प्रदेश तथा स्थानीय तहको काम कारवाही प्रभावित बन्दै आएको सरकारले बताउँदै आएको छ ।
राप्रपाका उपाध्यक्ष दीपक बोहरा उपेन्द्र यादवको पार्टीमा प्रवेश गर्दै !
सत्ताविना बाँच्नै नसक्ने चरित्र भएका राष्ट्रिय प्रजातन्त्र पार्टी(प्रजातान्त्रिक)का उपाध्यक्ष दीपक बोहरा उपेन्द्र यादव नेतृत्वको संघीय समाजवादी फोरममा प्रवेश गर्न लागेका छन् । फोरमका एक नेताका अनुसार उनले उपेन्द्र यादवसँग धेरै पटक छलफल गरिसकेका छन् ।
राप्रपाबाट केही नेताहरुसहित फोरममा प्रवेश गर्नलागेका उनलाई उपाध्यक्षमै मनोनीत गर्ने गरी सहमति भएको उपेन्द्र यादवले पार्टीको बैठकमै ब्रिफिङ गरिसकेको ती नेताले बताएका छन् ।
राप्रपाका कुन कुन नेता फोरममा आउन लागेका हुन् भन्ने कुरा भने ती नेताले खुलाएका छैनन् । ४ बर्षसम्म सत्तारुढ पार्टीको नेताका रुपमा ठेक्कापट्टा र नियुक्तिमा सेटिङ गर्ने र ४ बर्षपछि पनि फोरम पुनः बलियो शक्तिका रुपमा आउने देखेकाले उनी राप्रपा त्याग्न लागेका हुन् ।
फोरममा प्रवेश गरिसकेपछि ४ बर्षपछि चुनावमा रुपन्देहीबाट जित्न पनि सकिने आंकलन उनले आफ्ना निकटहरुसँग भन्ने गरेका छन् । फोरम प्रवेश गर्न लागेकोबारेमा बोहरासँग प्रतिक्रिया लिन खोज्दा उनी सम्पर्कमा आएनन् ।
टुक्राटुक्रा भएको राप्रपा अब शक्तिमा पुनः आउन सक्ने संभावना नदेखेपछि बोहरा फोरममा प्रवेश गरी सरकारका नियुक्तिदेखि ठेक्कापट्टाहरुमा चलखेल गर्ने दाउमा छन् । उनले शेरबहादुर देउवा नेतृत्वको सरकारमा स्वास्थ्य मन्त्री हुँदा नियुक्तिदेखि सरुवाहरुमा करोडौं रुपैयाँ घुस संकलन गरेको आरोप लागेको थियो ।
उपेन्द्र यादव मन्त्री भएपछि पनि बोहराले भित्रभित्रै स्वास्थ्य मन्त्रालय अन्तर्गतका नियुक्ति र सरुवामा खेल्न सुरु गरेका थिए । उनकै योजनामा बीपी कोइराला स्वास्थ्य विज्ञान प्रतिष्ठानको उपकुलपति डा. आरके रौनियारलाई सिनेट बोलाई हटाएर गुरु खनाल वा अरविन्द सिंहलाई ल्याउन लागिएको खुलेको छ ।
बोहरा स्वास्थ्य मन्त्री हुँदा पनि डा. रौनियारलाई हटाउन सिनेट बोलाउन चर्को दबाब दिएका थिए । स्वास्थ्य मन्त्री उपेन्द्र यादवले बोहराकै निजीसचिव भवनाथ खतिवडालाई राखेका छन् ।
त्यसो त दीपक बोहरा नेपाली राजनीतिका अति बदनाम पात्र हुन् । उनले २०६७ मा माधव नेपाल सरकारमा वन मन्त्री हुँदादेखि पछिल्लो पटक देउवाको सरकारमा श्रम र स्वास्थ्य मन्त्री हुँदा भ्रष्टाचार गरी करोडौं रुपैयाँ आर्जन गरेको आरोप छ । । उनीमाथि अख्तियार दुरुपयोग अनुसन्धान आयोगले छानबिन पनि गरिरहेकाले फोरममा प्रवेश गरी जोगिने उपाय खोजेको अर्थमा पनि लिन थालिएको छ ।
