विवाहित महिलालाई ब्ल्याकमेलिङ गर्दै यौन प्रस्ताव राख्दा हत्या

हाम्रो इकोनोमि

 

विवाहित महिलालाई प्रेमीसँग भेटेपछि ब्ल्याकमेलिङ गर्ने क्रममा एक जनाको ज्यानै गएको छ । गत बुधबार महोत्तरीको औरही–२, फुलबरियामा ४० वर्षीय बचु महतोको हत्या भएको हो ।

 

जिल्ला प्रहरी कार्यालय, महोत्तरीले घटनामा संलग्न भएको अरोपमा ३ जनालाई पक्राउ गरेको छ । पक्राउ पर्नेमा स्थानीय २२ वर्षीया जितनीदेवी महतो, २४ वर्षीय सुशील सहनी र २२ वर्षीय अनिलकुमार ठाकुर छन् । उनीहरुमाथि कर्तव्य ज्यान मुद्दामा म्याद थप गरेर अनुसन्धान भइरहेको छ ।

 

जब यौन प्रस्ताव राखेको प्रेमीले थाहा पाए…

महोत्तरीको औरही–२ की जितनीदेवी महतो विवाहित महिला हुन् । यद्यपि, उनको स्थानीय सुशील सहनीसँग प्रेम सम्बन्ध थियो । दुईजना सँगै बसेको बेला गत सोमबार स्थानीय बचु महतोले देखे ।

 

त्यो देखेपछि जितनीको मोबाइलसमेत उनले खोस्छन् र सबै आ–आफ्नो घरतिर लाग्छन् । मंगलबारबाट बचुले जितनीसँग यौनसम्पर्कको प्रस्ताव राख्न थाल्छन् । त्यो कुरा उनले प्रेमी सुशीललाई सुनाउँछिन्  रिसले चुर भएका सुशीलले बचुसँग मोबाइल माग्छन् । बचुले दिन मान्दैनन् ।

 

अन्ततः उनीहरु बचुको हत्या गर्ने योजना बनाउँछन् । यो काममा उनीहरुले अनिल ठाकुरलाई समेत प्रयोग गर्छन् ।

 

अन्ततः २५ मंसिरमा बचु उखुबारीमा गएका बला उनीहरुले घाँटी थिचेर हत्या गर्छन् । लगत्तै, प्रहरीले अनुसन्धान थाल्छ । त्यसक्रममा जितनीदेवी आफ्नै घरबाट समातिइन् भने सुशील भारततिर भाग्दै गर्दा महोत्तरीको मटिहानीबाट पक्राउ परे । ठाकुर भने सिन्धुलीबाट पक्राउ परे । प्रहरीले थप अनुसन्धान गरिरहेको जनाएको छ ।