नेपालमा दुई सय, पाँच सय र दुई हजार दरका भारतीय नोट नचल्ने

 

नेपालमा दुईवटा दरका भारतीय नोट नचल्ने भएका छन् । नेपालमा पाँच सय र दुई हाजर दरका भारतीय नोट नचल्ने भएका हुन् । यही सोमबार बसेको मन्त्रिपरिषद्को बैठकले दुई सय, पाँच सय र दुई हजार दर भारतीय नोट प्रयोगमा रोक लगाउने निर्णय गरेको हो ।

 

मन्त्रिपरिषद्को निर्णय सार्वजनिक गर्न आयोजित पत्रकार सम्मेलनमा सञ्चारमन्त्री तथा सरकारका प्रवक्ता गोकुल बासकोटाले यी तीन दरका भारतीय नोट प्रयोग नगर्न सर्वसाधरणलाई आग्रह गरेका छन् ।

सरकारद्वारा साना किसानको ऋण मिनाहा

सरकारले साना किसानहरुको ऋण मिनाहा गरेको छ । कृषि विकास बैंकबाट ऋण लिएका साना किसानहरुको ऋण मिनाहा गर्ने निर्णय सोमबारको मन्त्रिपरिषद बैठकले गरेको हो ।

 

बिहीबार निर्णय सार्वजनिक गर्दै सञ्चार तथा सूचना प्रविधिमन्त्री गोकुल बास्कोटाले यस्ता ऋण सरकारले तिरिदिने बताएका हुन् ।कृषि विकास बैंकमा यस्तो ऋण २९ करोडभन्दा बढी र ब्याज एक अर्बभन्दा बढी पुगिसकेको छ ।

अख्तियारभित्रै विक्रम पाण्डेका सुराकी, राजनारायण पाठकको भूमिकामाथि शंका

अख्तियार दुरुपयोग अनुसन्धान आयोगभित्रै ठेकेदार विक्रम पाण्डेका सुराकीहरु रहेको सुइँको पाएपछि टंगालमा हल्लीखल्ली मच्चिएको छ । अख्तियार प्रमुख नवीनकुमार घिमिरे अहिले आफ्नै कार्यालयभित्र भ्रष्टाचार आरोपीका सेवक को रहेछन् भन्ने खोजीमा लागेका छन् ।

ठूला विकासे आयोजनाहरुमा भइरहेको भ्रष्टाचारबारे छानविनका लागि अख्तियारले गृहकार्य गरिरहेकै बेला त्यहाँभित्रको गोप्य सूचना भ्रष्टाचार आरोपीसम्म पुग्ने गरेको खुलासा भएको हो ।

 

राप्रपा प्रजातान्त्रिकका नेतासमेत रहेका कालिका कन्स्ट्रक्सनका मालिक विक्रम पाण्डेमाथि मुद्दा चलाउन अख्तियारले तयारी गरिरहेका बेला कति रकम बिगो तोकिँदैछ भन्नेसम्मको पूर्वसूचना पाण्डेले पाएका थिए ।

 

विशेष अदालतमा मुद्दा दायर गरिसकेपछि अख्तियार प्रमुख घिमिरे अहिले आफ्नो कार्यालयमा विक्रम पाण्डेका सुराकी खोज्नतिर लागेको स्रोतले अनलाइनखबरलाई बतायो ।

 

स्रोतले भन्यो– ‘बिक्रम पाण्डेलाई मुद्दा चलाउनुअघि नै अख्तियारबाट उनलाई सम्पूर्ण रिपोटिङ भएको पाइएको छ । अख्तियारजस्तो संस्थामा बसेर भ्रष्टाचारीको पक्षमा काम गर्ने व्यक्तिको खोजी भइरहेको छ, फेला पर्नासाथ कारवाही हुन्छ ।

 

राजनारायण पाठकको भूमिकामाथि शंका

यसैबीच अख्तियार दुरुपयोग अनुसन्धान आयोगका आयुक्त राजनारायण पाठकको भूमिकामाथि नै मूल नेतृत्वले शंका गर्न थालेको स्रोतले अनलाइनखबरलाई बतायो ।

 

पाठकले भ्रष्टाचारी एवं शंकास्पद व्यक्तिहरुसँग अनुचित सम्बन्ध राख्ने गरेको भन्दै उनीमाथि समेत आन्तरिक छानविन हुन थालेको बुझिएको छ । अख्तियारको आयुक्त भइसकेपछि पाठकले आचारसंहिता विपरीत कार्यहरु गरिरहेको गुनासो बढेपछि अख्तियारको मूल नेतृत्व सजग भएको हो ।

 

देशमा भ्रष्टाचार नियन्त्रणका लागि भूमिका खेल्नुपर्ने संस्थामा विगतमा आयोगका पदाधिकारी नै भ्रष्टाचारमा लागेको गुनासो आउने गरेकाले यो संस्थाको छवि धूमिल बनेको अवस्था छ । लोकमानसिंह कार्कीका पालामा अख्तियार नै भ्रष्टाचारको अखडा बनेको चर्चा चलेको थियो । अहिले पनि आयोगले पूर्णरुपमा जनविश्वास पुनःआर्जन गर्न सकिरहेको छैन ।

 

ठूला भ्रष्टाचारीमाथि कडा रुपमा प्रस्तुत हुने तयारी गरिरहेको आयोगले कार्यालयभित्रैका धमिराहरु हटाइसकेपछि सचिवमा पनि हेरफेर गर्ने र पुरानै सचिव प्रेम राईलाई ल्याउन सक्ने स्रोतको भनाइ छ । प्रेम राई प्रधानमन्त्री केपी ओलीका निकटस्थ मानिन्छन् । उनी अहिले गृहमन्त्रालयका सचिव छन् ।

हाल अख्तियारको सचिवमा महेश्वर न्यौपाने कार्यरत छन् ।

 

खाली सीटमा विपक्षीको दाबी

हाल अख्तियार दुरुपयोग अनुसन्धान आयोगमा चार जनामात्रै पदाधिकारी छन् । अख्तियार प्रमुखमा नवीनकुमार घिमिरे छन् भने आयुक्तहरुमा डा. गणेशराज जोशी, राजनारायण पाठक र डा. सावित्री थापा गुरुङ कार्यरत छन् ।

 

संविधानको धारा २३८ को उपधारा १ अनुसार अख्तियारमा एकजना प्रमुख आयुक्त र चारजना आयुक्तहरु रहने प्रावधान छ । दीप बस्न्यातको बहिर्गमन पञ्चात नवीन घिमिरे प्रमुख आयुक्त बनेपछि अब एउटा आयुक्त पद खाली छ ।

 

सूत्रहरुका अनुसार प्रमुख प्रतिपक्षी दल नेपाली कांग्रेसले अख्तियारजस्तो संवैधानिक अंगमा एकजना आयुक्त कांग्रेसको कोटाबाट हुनुपर्ने माग गरिरहेको छ । कांग्रेस सभापति शेरबहादुर देउवाले गणेशराज कार्कीलाई आयुक्त बनाउन प्रधानमन्त्री केपी ओलीसँग लबिङ गरिरहेका छन् ।

 

अख्तियारजस्तो संवैधानिक अंगमा सत्तापक्षको मात्रै एकाधिकार नहुने गरी विपक्षीको पनि प्रतिनिधित्व हुनुपर्ने जिकिर कांग्रेस नेताहरुको छ ।

 

गोपाल पराजुलीकी श्रीमतीको काज फिर्ता

यसैबीच, अख्तियार दुरुपयोग अनुसन्धान आयोगमा उपसचिवका रुपमा कार्यरत बसन्ता पराजुलीलाई हटाइएको स्रोतले बतायो । बसन्ताका पति गोपाल पराजुली प्रधानन्यायाधीश भएका बेला बसन्तालाई वैकल्पिक उर्जा प्रवद्र्धन केन्द्रबाट अख्तियारमा काज खटाइएको थियो ।

दीप बस्न्यात अख्तियार प्रमुख रहुञ्जेल त्यहाँ खटिएकी बसन्तालाई नवीनकुमार घिमिरे आएपछि काज फिर्ता गरी अख्तियारबाट विदाइ गरिएको स्रोतले बतायो ।

 

त्यसैगरी अख्तियारमा रहेर शंकास्पद क्रियाकलाप गरेको भन्दै भवानी सुवेदीलाई पनि हटाइएको स्रोतले बतायो । सुवेदी लोकमानसिंह कार्कीको कार्यकालमा उनका सहयोगी एवं हर्ताकर्ता थिए ।