बढी पैसा मागेर ट्याक्सी मिटरमा जान मान्दैनन् ? ट्राफिक भन्छ–९८५१२९५१०० सीधा सम्पर्क गर्नुस्

हाम्रो इकोनोमि

 

तपाईं कतै जानुपर्दा ट्याक्सी खोज्दै हुनुहुन्छ ? तपाईं रोकिएको स्थानमा ट्याक्सी छ ? यदि छ भने तपाईं ट्याक्सी चढनुस्, अनि भन्नुस् आफू जान खोजेको गन्तव्य ।  ट्याक्सी चाकलले त्यसपछि मिटर चलायो भने ठिकै छ तर मिटर नचलाइ बार्गेनिङ गर्न खोजे सीधा सम्पर्क गर्न ट्राफिकले आग्रह गरेको छ ।

 

ट्राफिक प्रहरीले ९८५१२९५१०० वा १०३ नम्बरमा फोन गरेर ट्याक्सीको नम्बर टिपाउन प्रहरीले आग्रह गरेको छ ।

 

महानगरीय ट्राफिक महाशाखाको नम्बर हो यो । यो नम्बरमा टिपाएका नम्बरका ट्याक्सीहरु कारवाहीमा पर्छन् । काठमाडौंका विभिन्न स्थानमा यात्रुहरुले ट्याक्सीहरुबाट यस्तै प्रकारका समस्याको सामना गर्नुपरेको छ ।

 

महानगरीय ट्राफिक प्रहरी महाशाखाका एसएसपी वसन्त पन्तका अनुसार उपत्यकाको चक्रपथको २ किलोमिटरसम्म मात्रै ट्याक्सी मिटरमा जान वाध्य हुनेछन् । त्योभन्दा लामो दुरीको यात्रा गर्नुपरे आपसी सहमतिमै भाडा तय गर्नुपर्ने हुन्छ ।

 

ट्याक्सी चालकले जान नमान्ने, मिटर नचलाउने, बार्गेनिङ गर्ने क्रम बढेपछि महाशाखाले काठमाडौंमा चल्ने ट्याक्सीमाथी कारवाही अभियान सुरु गरेको छ । यसका लागि ट्राफिक प्रहरी आफैँ यात्रु बनेर ट्याक्सीको अनुमगनमा निस्किएका छन् ।

 

महाशाखाका प्रहरी निरीक्षक (इन्सपेक्टर) कृष्णराज सापकोटाको सादा पोशाकको टोली यहि मंसिर २० गतेबाट अनुमगनमा निस्किएको हो । एसएसपी पन्त भन्छन्,‘‘हाम्रै टोली ट्याक्सी चढ्छ, मिटर चलाए, वार्गेनिङ नगरे, ढोका खोलेर जाउ भन्नेबित्तिकै गए हामी प्रहरी भन्दै पहिचान दिन्छ र ओर्लिन्छ । यी सबै प्रक्रिया पूरा नगर्नेलाई ठाउँको ठाउँ कारवाही गर्छ ।’’

 

यस्तो कार्यमा संलग्नलाई ३ हजारसम्म जरिबाना गर्ने व्यवस्था छ । यातायात व्यवस्था विभागले ट्राफिक निर्देशनालय र महाशाखालाई सवारी तथा यतायात व्यवस्था ऐन २०४९ को दफा ६० अनुसार लाइसेन्स निलम्बन गर्न सकिने निर्णय गरेर पठाएपछि महाशाखाले ट्याक्सीमाथी निगरानी बढाएको हो । नियमअनुसार मिटर सुरु भएपछि सुरुमै १४ रुपैयाँ उठ्छ । त्यसपछि पहिलो किलोमिटरमा ५० रुपैया भाडादर आउँछ भने त्यसपछि प्रत्येक किलोमिटरको ३६ रुपैयाँ दररेट तोकिएको छ ।

 

महाशाखाबाट ट्याक्सीको अनुमगनमा निस्किएका इन्सपेक्टर सापकोटा भन्छन्,‘‘हामी दैनिक १ सयको हाराहारीमा ट्याक्सी चालकलाई कारवाही गरीरहेका छौं । कतिपय ठाउँमा ट्याक्सी चालहरु जानै नमान्ने,मिटरमा जाँदा बार्गेनिङ गर्ने गरेको पाइयो । हामीले यस्ता चालकहरुलाई ठगि ऐनमा समेत कारवाहि गर्ने गरेका छौं ।’’

 

त्यसो त अधिकांश ट्याक्सीले यात्रुलाई मिटरमा उठेको बिल प्रिन्ट दिनुपर्छ । प्रायःजसो ट्याक्सीले बिल दिँदैनन् । महाशाखाले मंसिर महिनामा मात्रै बुधबारसम्म १ हजार ट्याक्सी चालकलाई कारवाही गरेको छ । चालु आर्थिक वर्षमा हेर्ने हो भने हालसम्म ३ हजार ३ सय २० ट्याक्सी चालक कारवाहीमा परेका छन् ।

 

उपत्यकामा १० हजार ५ सयभन्दा बढी ट्याक्सी दर्ता छन् । तर सञ्चालनमा ९ हजार ५ सय ट्याक्सी छन् । तीमध्ये अधिकांश काठमाडौंमै चल्छन् । महाशाखाका एसएसपी पन्त यात्रु पनि सचेत हुनुपर्ने बताउँछन् । ‘‘कानुनले दिएको सुविधा प्रयोग गर्ने कुरामा हिचकिचाउनु हुँदैन,आफूलाई शंका लागेमा,ठगिएको महसुस गरेमा सीधै प्रहरीमा सम्पर्क गर्नुपर्छ ।’’