प्रदेश कमिटीको नामावली भोलिसम्म सार्वजनिक हुन्छ– महासचिव पौडेल

 

करिब एक साता अघि नेपाल कम्युनिष्ट पार्टी(नेकपा)को सचिवालय बैठकले निर्णय गरेको प्रदेश कमिटीको पूर्ण नामावाली अझै सार्वजनिक भएको छैन ।

 

गत १२ गते (बुधबार) बसेको सचिवालय बैठकले सात प्रदेशका कमिटिको एकीकरणलाई पूर्णता दिएको निर्णय गरेको थियो ।  तर नामावली १३ गते विहिबार मात्र सार्वजनिक गर्ने प्रवक्ता नारायणकाजी श्रेष्ठले बैठकपछि बताएका थिए ।

 

श्रेष्ठले भनेका थिए, ‘सातै प्रदेश कमिटिको एकीकरणलाई पूर्णता दिइयो अर्थात् सबै प्रदेश कमिटिका सदस्यको नाम टुंगो लगायो र नामावली हामीले भोलि अर्थात विहिबार मात्र सार्वजनिक गर्नेछौं ।’ सार्वजनिक गर्ने भनिएको सातादिन वित्नै लाग्दा नामावली सार्वजनिक हुन सकेको छैन ।

 

नेकपा स्रोतका अनुसार नेकपाका वरिष्ठ नेता माधव कुमार नेपालले प्रदेश कमिटीको अन्तिम नामावलीमा असन्तुष्टि प्रकट गरेपछि साता दिन वित्नै लाग्दा पनि नामावली सार्वजनिक नगरिएको हो । यद्यपि प्रदेश नम्बर १, २ र ३ बाहेक अन्य प्रदेश कमिटीको लागि सिफारिस गरिएका नामावलीको अन्तिम टुंगो भने लाग्न सकेको छैन ।

 

माधव नेपालको असन्तुष्टिका कारण नामावली सार्वजनिक नभएको विषयलाई नेकपाका महासचिव विष्णु पौडेल भने अस्वीकार गर्छन् ।

 

महासचिव पौडेलले प्रदेश कमिटीको नामावलीमा सचिवालयका कुनै सदस्यको असहमति नभएको दाबी गरे । ‘सम्भवतः प्रदेश कमिटीको नामावली आजै या नभए भोलिसम्म सार्वजनिक हुन्छ’ पौडेल भन्छन्,‘त्यस लगत्तै हामी पोलिटब्युरो गठन गर्ने छलफलमा जुट्नेछौं ।’

 

पौडेलका अनुसार प्रदेश कमिटी गठनको लागि सहमति जुटिसकेको छ । नामावली सार्वजनिक भयो कि भएन भन्ने विषय गौण भएको पौडेलले बताए ।

 

के थियो निर्णय ?

तल्लो तहमा देखिएको एकताको विवाद हल गर्नको लागि गत कार्तिक ८ गते नेपाल कम्युनिष्ट पार्टी (नेकपा)ले प्रदेश कमिटीलाई पूर्णता दिन र जिल्ला तहको विवाद मिलाउन नयाँ विधि र मापदण्ड बनाउने निर्णय गरेको थियो । सचिवालय बैठकले प्रदेश कमिटीका सदस्यहरु चयन गर्नका लागि नयाँ विधि र मापदण्ड बनाउने निर्णय भएको थियो ।

 

बैठकमा नयाँ विधि र मापदण्डको मस्यौदा तयार पार्न सचिवालय सदस्य रामबहादुर थापा र महासचिव विष्णु पौडेल रहेको कार्यदल गठन गरेको थियो ।  तर, हालसम्म पनि उक्त कार्यदलले नयाँ विधी र मापदण्डबाट प्रदेश कमिटीमा रहने सदस्यहरु चयन गर्ने र त्यसलाई सचिवालयबाट टुङ्गो लगाई स्थायी समिति बैठकमा पेश गरेको छैन ।

 

केन्द्रीय सदस्यहरूको कार्यविभाजनका लागि महासचिव विष्णु पौडेल र सचिवालय सदस्य रामबहादुर थापा रहेको कार्यदलले अझै पनि गृहकार्य गरिरहेको बताएको छ । केन्द्रीय सदस्यहरुको कार्यविभाजनपछि मात्र पोलिटव्युरो गठनको तयारीमा नेकपा रहेको महासचिव पौडेलले बताए । तर, केन्द्रीय सदस्यको कार्यविभाजनको टुंगो लगाउने विषयमा धेरैको असहमति रहेको देखिन्छ ।

 

असोज ५ गते बसेको सचिवालय बैठकले सातवटै प्रदेशका लागि इन्चार्ज, अध्यक्ष, सहइन्चार्ज र सचिवको टुंगो लगाएको थियो । प्रदेशको नेतृत्वलाई लिएर सचिवालयमा विवाद देखिएको थियो । माधव नेपाल लगायतले उक्त निर्णयको विरोध गरेका थिए । त्यतिबेलै नेकपामा देखिएको असन्तुष्टि हालसम्म कायमै रहेको छ । स्थायी कमिटिलाई ‘बाइपास’ गर्दै दुई अध्यक्षले नेतृत्व छनौट गरेको भन्दै विवाद उत्पन्न भएको थियो ।

 

पार्टीका शीर्ष नेताद्वय माधवकुमार नेपाल घाना र नारायणकाजी श्रेष्ठ चीन भ्रमणमा गएको समयमा भएको निर्णयको विरोध नेता नेपालले गरेका थिए । उनले सकारको कामकारवाहीलाई लिएर समेत संसदबाटै आलोचना गरेपछि नेकपाको विवाद सतहमा देखिएको थियो ।

 

स्रोतका अनुसार प्रदेश नम्बर पाँचको नेतृत्व विवाद सबभन्दा बढी पेचिलो छ । पूर्व एमालेको भागमा परेका सात वटै जिल्लाको नेतृत्वमा केपी ओली निकट नेताहरू मात्र सिफारिस भएपछि वरिष्ठ नेता माधव नेपाल समूह आक्रोशित भएका थिए ।

 

२२ को असन्तुष्टि कायमै

यसबीचमा २२ केन्द्रीय सदस्यहरुले बुधबारको सचिवाल बैठकको पूर्व सन्ध्यामा पार्टी र सरकार सञ्चालन सही ढंगमा नभएको भन्दै पार्टी शीर्ष नेतृत्वको ध्यानाकर्षण गराएका थिए । उनीहरुले पार्टीका निर्णय व्यक्तिमा केन्द्रीत भएको सरकार सही ढंगमा सञ्चालन हुन नसकेको भन्दै पार्टी र सरकारको आलोचना गर्दै केही सुधारका लागि सुझाव दिएका थिए । यस विषयमा पनि सचिवालय बैठकमा छलफल भएको स्रोतको दाबी छ ।