राजेन्द्र महतोसँग भनाभन भएपछि महन्थ ठाकुर हिडे दिल्ली
राष्ट्रिय जनता पार्टी (राजपा) नेपाल अध्यक्षमण्डलका सदस्य महन्थ ठाकुर आज भारतको राजधानी दिल्ली जान लागेका छन् । स्वास्थ्य उपचारका लागि भन्दै उनी दिल्ली जान लागेका हुन् । राजपा नेपालमा आन्तरिक द्धन्द चलिरहेको बेला नेता ठाकुर दिल्ली जानुलाई अर्थपूर्ण रुपमा लिएको छ ।
अध्यक्षमण्डलको संयोजकमा राजेन्द्र महतो आएपछि राजपा नेपालमा विवाद उत्कर्षमा पुगेको हो । यसअघि महन्थ ठाकुर अध्यक्षमण्डलका संयोजक थिए । तर उनलाई बहुमतबाट हटाएपछि विवाद बढेको हो ।
पार्टीभित्र विवाद बढेकै बेला उनी दिल्ली जान लागेका हुन् । उनी मंसिर १२ गतेनै दिल्ली जाने तयारी गरेका थिए तर टिकट नपाएपछि उनी आज जान लागेका हुन् । यसबीचमा पार्टीका अध्यक्षमण्डलका सदस्यको बीचका कुराकानी समेत गरिसकेका छन् ।
यसअघि उनी स्वास्थ्य उपचारका लागि साउन १३ गते गएर १८ गते फर्केका थिए । छोरी र ज्वाँईलाई साथमा लिएर स्वास्थ्य उपचारमा दिल्ली पुगेका उनी त्यतिबेला राजनीतिक भेटघाट पनि गरेका थिए । गृहमन्त्री राजनाथ सिंहदेखि सुरक्षा सल्लाहकार अजित डोभलसम्मलाई भेटेका थिए ।
उपचारमा संलग्न डाक्टरले अध्यक्षमण्डलका सदस्य ठाकुरलाई ६ महिनापछि पुनः आउन भनेका थिए । सोहीअनुसार उनी दिल्ली जान लागेका हुन् । २०७४ चैत २७ गते दिल्ली गएका ठाकुरको स्वास्थ्य जाँच गर्दा मुटुमा ‘ब्लड ब्लोकअप’ देखिएपछि अप्रेशन गरी तीनवटा ‘स्टेन’ राखिएको थियो ।
केहि वर्ष पहिले संयोजक ठाकुरको मुटुमा समस्या देखिएपछि ‘पेसमेकर’ राखिएको थियो । पेसमेकर राखिएपछि उनले नियमित सम्पर्कमा रही स्वास्थ्य जाँच गराई राख्नुपर्ने थियो । तर उनी दुई वर्षदेखि नियमित जाँच गराउन सकेका थिएन ।
पछि जाँच गराउँदा ब्लड ब्लोकअप देखिएपछि अप्रेशन गरी स्टेन राखिएको हो । त्यसको फ्लोअपका लागि उनी दिल्ली जान लागेका हुन् । दिल्लीमा उच्च तहका नेतालाई भेट्ने कार्यक्रम पनि रहेको पार्टी स्रोतले जनाएको छ । तर को कोसँग भेट्ने कहिले भेट्ने केही खुलाएको छैन ।
के भयो १० मिनेटको बैठकमा ?
अध्यक्षमण्डलको संयोजकमा राजेन्द्र महतो चयन भएपछि मंसिर १० गते बैठक बोलाइएको थियो । तर त्यो दिन बैठक बसेन । महतो संयोजक भएपछि पार्टीभित्र बढेको असन्तुष्टिले पार्टीको बैठक अनिश्चितकालका लागि स्थगित भएको थियो । बैठक स्थगित भएपछि पार्टीका बारेमा विभिन्न टिकाटिप्पणी शुरु भएको थियो ।
यसैबीचमा संयोजक महतोले मंसिर १४ गतेका लागि बैठक बोलाएका थिए तर सो बैठकमा ठाकुर जान तयार थिएन । त्यो थाह पाएर संयोजक महतो उनकै निवासमा पुगको थिए । नेता ठाकुरले आफू अस्वस्थ्य रहेको कारण बैठकमा जान नसकिने भनेपछि महतोले राजपा नेपालको बारेमा नानाथरीका समाचारहरु आइरहेका छन् । एकचोटी पार्टी कार्यालय गएर फर्केपछि सबै भ्रमहरु हट्छन् भनि उनलाई कार्यालयसम्म ल्याउन सफल भए ।
ठाकुर कार्यालय गएपनि बैठकमा उनी गएनन् । त्यसपछि अध्यक्षमण्डलका सदस्यहरु महन्थ ठाकुरकै कार्यकक्षमा गएर बसे । संयोजक फेरिएपछि पार्टीभित्र र बाहिर विभिन्न टिकाटिप्पणीहरु भइरहेका छन् । यसलाई समाधान गर्दै अगाडि बढ्नुपर्ने कुरा उठेको थियो ।
त्यसको जवाफमा महन्थ ठाकुरले आफू राजपा नेपाल बनाउन आएको भत्काउनका लागि होइन भन्दै उनले उपचारका गराउन केही दिनका लागि बाहिर गइरहेको उताबाट फर्केपछि पार्टीका कामहरु अगाडि बढाउने कुरा राखेका थिए ।
त्यसअघि महाधिवेशन लगायत अन्य कामहरुको बारेमा गृहकार्य गरिरहन ठाकुरले भनेर हिडेका थिए । यति भनेर हिडेपछि संयोजक महतो ठाकुरलाई तलसम्म छाड्न आएका थिए ।
