‘सच्चा माता’ को ब्लेसिङ विवादमा, प्रधानमन्त्री दम्पतीले नलिने

 

एसिया प्यासिफिक समिटको दोस्रो दिन आज दक्षिण कोरियाकी ‘सच्चा माता’ हाक जा हान मुनले आज ३ सय जोडीलाई ‘ब्लेसिङ’ दिने कार्यक्रम छ । माताबाट ब्लेसिङ लिन प्रधानमन्त्री दम्पतीसहित तीन सय जोडीलाई निम्ता गरिएको छ ।

 

तर, प्रधानमन्त्री केपी शर्मा ओली र उनकी पत्नी राधिका शाक्य भने ब्लेसिङमा सहभागी नहुने भएका छन् । प्रधानमन्त्रीका परराष्ट्र मामला सल्लाहकार राजन भट्टराईले प्रधानमन्त्री दम्पतीले मातासँग ब्लेसिङ नलिने अनलाइनखबरलाई बताए ।

 

‘प्रधानमन्त्रीज्यूले आइतबार साढे ४ बजे गुड गभर्नेन्सको सेसनमा सम्वोधन गर्ने कार्यक्रम छ र ब्लेसिङ लिने कुरा गलत हो,’ उनले भने ।

 

कोरियाली माताले प्रधानमन्त्रीलाई ‘गुड गभर्नेन्स अवार्ड’ दिने कार्यक्रम पनि छ । प्रधानमन्त्रीले अवार्ड भने ग्रहण गर्ने सल्लाहकार भट्टराईले बताएका छन् । तर आयोजकले चलाखीपूर्वक ब्लेसिङ समारोहमै प्रधानमन्त्रीलाई अवार्ड दिने सेड्युल बनाएको छ ।

 

विवाद आएपछि आयोजक यूनिभर्सल पिस फेडरेसन नेपालले ब्लेसिङ कार्यक्रमको नाम फेरेको छ । यूपीएफले दिएको नयाँ प्रोग्राम सेड्यूलमा यसलाई ‘पीस एन्ड फेमिली फेस्टिबल सेरिमोनी’ नाम दिइएको छ । एक जानकारका अनुसार यस समारोहको मूख्य चिज भनेको ब्लेसिङ नै हो ।

 

पुरानो सेड्यूलमा साढे ४ बजे प्रधानमन्त्री दम्पतीलगायत पाँच सय जोडीले माताबाट ब्लेसिङ लिने उल्लेख थियो । प्रधानमन्त्री नै सहभागी नहुने भएपछि आयोजक निराश बनेको बुझिएको छ ।

 

ब्लेसिङका लागि देशभरका मेयर तथा उपमेयरहरुलाई जोडीसहित निम्तो गरिएको छ । तर, विवाद आएपछि अधिकांस मेयर तथा उपमेयरहरु झस्किएका छन् । उनीहरु ब्लेसिङ लिने वा नलिनेमा द्विविधामा रहेका छन् ।

 

एक मेयरले भने, ‘सुरुमा त आउने वचन दिएको थिएँ, तर कुरा बुझ्दै जाँदा क्रिस्चियन कार्यक्रम रहेछ, त्यसैले नजाने मनस्थितिमा पुगेको छु ।’ आफूलाई बारम्बार फोन गरेर ताकेता गरिएको उनी बताउँछन् ।

 

काठमाडौंका मेयर विद्यासुन्दर शाक्यले आफूलाई जोडीसहित ब्लेसिङ लिन निम्तो आएको भए पनि आफू नजाने बताए ।

 

के हो ब्लेसिङ ?

ब्लेसिङको सोझो अर्थ आशिर्वाद हो, तर यो यतिमै सिमित भने छैन । यूनिफिकेसन चर्चका संस्थापक सन म्योङ मूनले आफ्नो वंश विश्वव्यापीरुपमा फैलाउने सोच राखेका थिए । यही सोचअनुसार उनले सुरुको चरणमा ४ सय महिलाहरुसँग आफैंले यौनसम्वन्ध राखेको बताइन्छ । तर, यसबाट मात्र साध्ये नभएपछि जोडीहरुलाई ‘ब्लेसिङ’ दिने परम्परा सुरु गरेका हुन् ।

 

पहिलो श्रीमतीसँग डिभोर्सपछि १९६० मा मुनले आफूभन्दा २३ वर्ष कान्छी हाक जा हान मुनसँग दोस्रो बिहे गरेका थिए । त्यसपछि आफ्नो जोडीलाई उनले ‘ट्रु प्यारेन्ट्स’ (सच्चा मातापिता) भन्न लगाए र अन्य जोडीहरुलाई ब्लेसिङ दिन सुरु गरे ।

 

कोरियामा पहिलोपटक ब्लेसिङ समारोह आयोजना हुँदा ३६ जोडी सहभागी थिए, जसमध्ये १२ जोडी पूर्वविवाहित थिए । त्यबिेला मुनले रक्सीमा आफ्नो गोप्य चिज हालेर झोलपदार्थ तयार गरी जोडीहरुलाई खान दिए । यसलाई ‘होली वाइन’ भन्न थालियो । यही ‘होली वाइन’ पिउनु नै ब्लेसिङको सबैभन्दा महत्वपूर्ण रीति हो ।

 

मुनका अनुयायीहरुले आफूखुशी विहे गर्न पाउँदैनन् । उनीहरुले आफ्नो फोटो लिडरलाई पठाएपछि लिडरले जोडीहरुको ‘म्याचिङ’ गर्छन् । पहिले यो काम मुन आफैंले गर्थे । तर उनी एक्लैले नभ्याउने भएपछि सम्वन्धित देशका लिडरहरुलाई जिम्मेवारी दिन थालियो ।

 

नेपालमा पनि यो संस्थामा लागेकाहरुले लिडरहरुबाट ‘म्याचिङ’ गराइएको व्यक्तिसँगै नै बिहे गर्नुपर्छ । यसरी जोडी छानिदिने काम अन्तर्राष्ट्रिय लिडर एकनाथ ढकाल र नेपाल लिडर सन्तोष पौडेलले गर्ने गरेका छन् ।

 

यसरी म्याचिङमार्फत बनेका गाँसिएका जोडीहरुले बिहे गर्दा ‘ब्लेसिङ’ लिनै पर्छ । उनीहरुका लागि ब्लेसिङ नै विवाह हो । यूपीएफले विभिन्न समयमा सामुहिक विवाह वा ब्लेसिङ आयोजना गर्ने गरेको छ ।

 

सबैभन्दा ठूलो समारोह १९९७ मा न्यूयोर्कमा भएको थियो, जहाँ २८ हजार जोडीहरुले भाग लिएका थिए । सुरु–सुरुमा चर्चका सदस्यहरुलाई मात्रै ब्लेसिङ दिइन्थ्यो, पछि अरुलाई पनि दिन थालियो । नेपालमा पनि बारम्बार ब्लेसिङ समारोह भइराख्छ ।

 

यस्तो हुन्छ प्रक्रिया

१. पापको अन्त्य र नयाँ सुरुवात गर्ने भन्दै जोडीहरु आपसमा तीनपटक टाउको ठोकाउँछन्, जसलाई चास्टेनिङ सेरेमोनी भनिन्छ ।

२. मुनको पापरहित बंशमा समाहित हुने भन्दै जोडीहरुले होली वाइन पिउँछन्, जसलाई होली वाइन सेरिमोनी भनिन्छ ।

३. क्रिस्चियन शैली अनुसार जोडीहरुले कसम खान्छन् । सञ्चालकले एउटा प्रार्थना गर्छ र जोडीहरुलाई होली वाटर सेचन गरिन्छ । यसलाई होली ब्लेसिङ सेरेमोनी भनिन्छ ।

४. ४० दिनसम्म जोडीहरु शारीरिक सम्वन्धबाट टाढा रहन्छन् । यसलाई सेपेरेसन पिरियड भनिन्छ ।

 

५. सेपेरेसन पिरियड सकिएपछि लगातार तीन दिनसम्म फादर मुनको तस्वीर अगाडि राखेर जोडीहरुले यौनसम्पर्क राख्नुपर्छ, यसलाई थ्री डे सेरिमोनी भनिन्छ । यौन सम्पर्क राख्ने आसन पनि मुनले तोकेका छन् ।

 

वास्तविक प्रक्रिया यस्तो भए पनि नेपालमा आज आयोजना गरिने ब्लेसिङ भने देखावटी मात्रै हो । यसमा धेरै प्रक्रियाहरु ‘स्किप’ गरिने सम्भावना छ । त्यसो त अहिले आयोजकहरु ब्लेसिङको कार्यक्रम नै नभएको दावी गर्न थालेका छन् ।

 

यूपीएफका नेपाल लिडर सन्तोष पौडेलले अनलाइनखबरसँग झोक्किदै भने, ‘ब्लेसिङ स्लेसिङ केही हुँदैन, फेमिली फेस्टिबल मात्रै हुने हो ।’