‘ए’ डिभिजन लिग फुटबलमा पुलिसको जित
काठमाडौं । पल्सर सहिद स्मारक ‘ए’ डिभिजन लिग फुटबलमा विभागीय टोली नेपाल पुलिस क्लबले तेस्रो जित हात पारेको छ । आज भएको खेलमा न्युरोड टिम एनआरटीलाई ३-० ले पराजित गर्दै पुलिसले लिगको तेस्रो जित आत्मसात गरेको हो ।
सातदोबाटोस्थित एन्फा कम्प्लेक्समा भएको खेलमा पुलिसलाई जित दिलाउन निर कुमार राईले दुई गोल गरे । यस्तै अभिषेक रिजालको नाममा एक गोल रह्यो ।
खेलको ४१ औं मिनेटमा निर कुमारको गोलबाट पुलिसले सुरुवाती अग्रता बनाएको थियो । खेलमा पुलिसका निर कुमार राई म्यान अफ दि म्याच चुनिए । जितसंगै पुलिसले ५ खेलबाट १० अंक जोडेको छ भने तेस्रो स्थानमा उक्लिएको छ । एनआरटीको यो चौथो हार हो ।
