नेपालसँगै बिदेशमा ‘प्रसाद’लाई उच्च शो
प्रतिक्षित मानिएको चलचित्र ‘प्रसाद’को माग बिदेशमा उच्च देखिएको छ ।
युरोप वितरणको अधिकार लिएका सुरज कार्कीका अनुसार युरोपका ११ देशमा चलचित्र प्रसादको प्रदर्शन कन्फर्म भइसकेको छ ।
उनका अनुसार ११ देशमा २० शो बुक भइसकेको र अन्य देशबाट पनि चलचित्रको माग बढीरहेको छ ।
डेनमार्क, पोल्याण्ड, माल्टा, जर्मनी, फिनल्याण्ड, अष्ट्रीया, पोर्चुगल, बेल्जियम, नर्वेलगायतका देशमा प्रदर्शन कन्र्फम भएको प्रसादको पहिलो युरोप शो डिसेम्बर १४ मा फिनल्याण्डमा हुनेछ ।
एक दर्जन बढी चलचित्रको युरोप वितरकका रुपमा काम गरेका कार्कीका अनुसार ‘छक्का पञ्जा ३’ पछिको हाई डिमाण्डेड मुभी प्रसाद हो ।
यसअघि छक्का पञ्जा ३ ले युरोपमा अहिले सम्मकै उच्च ३० शो पाएको थियो ।
युरोपका अन्य देशबाट प्रसादको माग बढीरहेको भन्दै उनले छक्का पञ्जा ३ कै हाराहारीमा प्रसादको शो हुने बताएका छन् ।
यता अष्ट्रेलियामा सेम डे चलचित्र प्रदर्शनको तयारी भएको छ ।
अष्ट्रेलिया प्रदर्शनको अधिकार लिएको गोर्खे इन्टरटेनमेण्टका नविन मानन्धरका अनुसार ७, ८, ९ र १० डिसेम्बरमा चलचित्र प्रसाद अष्ट्रेलियामा प्रदर्शन हुनेछ ।
अष्ट्रेलियामा पनि चलचित्रको माग उच्च भएकोले सेम डे प्रदर्शनको तयारी थालेको बताइएको छ ।
अष्ट्रेलियाका विभिन्न शहरहरुमा चलचित्र प्रदर्शन हुनेछ ।
यता युके, जापान नर्वे र हङकङलगायतका देशमा पनि चलचित्र प्रसादको माग उच्च देखिएको सम्वन्धित देशका वितरकहरुले जनाएका छन् ।
उनीहरुका अनुसार सम्वन्धित देशमा चाँडै नै चलचित्रको प्रदर्शन मिति तय हुनेछ ।
मंसिर २१ गतेबाट प्रदर्शन हुने चलचित्रमा विपिन कार्की, निश्चल बस्नेत, नम्रता श्रेष्ठ, बसुन्धरा भुषाललगायतका कलाकारको अभिनय रहेको छ ।
सुभाष थापा प्रोडक्सनको व्यानरमा सुभाष थापाले निर्माण गरेको चलचित्रलाई दिनेश राउतले निर्देशन गरेका हुन ।
चलचित्रमा राजेश श्रेष्ठको छायाँकन, लोकेश बज्राचार्यको सम्पादन, हिमाल केसीको द्वन्द्व र सुशिल पौडेलको लेखन रहेको छ ।
विकास सुबेदी चलचित्रका एसोसियट निर्देशक हुन ।
