मन्त्रीको परिक्षा लिदै प्रधानमन्त्री, सबै मन्त्रीले एक एक कार्यप्रगति विवरण बुझाउनुपर्ने
प्रधानमन्त्री केपी शर्मा ओलीले आजबाट मन्त्रालयको कार्यप्रगतिको समिक्षा गर्नु हुने भएको छ । सरकार तथा मन्त्रालयको काम कारबाहीलाई लिएर आलोचना र आफैले पनि असन्तुष्टि व्यक्त गरिरहेका बेला प्रधानमन्त्रीले सम्बन्धित मन्त्री र मन्त्रालयका सचिवसँग कार्य प्रगतीका बिषयमा छलफल गर्न लाग्नुभएको हो । सिंहदरवारमा हुने छलफलमा एक मन्त्रालयलाई डेढ देखी दुई घण्टासम्म छुट्टाइएको छ ।
आगामी शुक्रवारसम्म छलफलको तयारी गरेको प्रधानमन्त्री तथा मन्त्रिपरिषद् कार्यालयले मन्त्रालय र सचिवको टोलीलाई चार समुहमा बिभाजन गरेको छ । असार अन्त्यमा मन्त्रालयले पेश गरेका कार्ययोजनाका आधारमा प्रधानमन्त्री ओलीले मन्त्रालयको समिक्षा गर्नुहुने प्रधानमन्त्री कार्यालयका प्रबक्ता बिनोद कुँवरले बताउनुभयो ।
आर्थिक वर्ष सुरुसँगै बजेट कार्यान्वयन सुरु भएपनि पहिलो २ महिनामा ७ प्रतिशत हाराहारीमा मात्र बिकास खर्च भएपछि ओली नेतृत्वको सरकारको कार्यशैलीलाई लिएर जनस्तरबाटै असन्तुष्टि बढेको थियो ।
छलफलसँगै मन्त्री र सचिवको क्षमता मुल्याङ्कन पनि गरिने प्रधानमन्त्री निकट स्रोतले जनाएको छ । प्रधानमन्त्री ओली स्वयमले पनि मन्त्रीहरुको काम कारबाहिलाई लिएर असन्तुष्टि जनाउँदै आउनुभएको छ ।
मन्त्रीहरुलाई थप जिम्मेबार बनाउँदै जनचाहानासँग सरकारको दुरी समानन्तर बनाउन समिक्षा उपलब्धिमुलक हुने बालुवाटारको निष्कर्ष छ । तर, सत्तारुढ नेकपाका केही नेताहरुले मन्त्रीहरुले प्रधानमन्त्रीलाई आश्वस्त पार्न नसके मन्त्रीहरुको हेरफेर समेत हुन सक्ने संकेत गरेका छन् ।
