हाकिमको मिलेमतोमा गुठीको जग्गामा करोडौं ठगी

हाम्रो इकोनोमि

 

गुठी संस्थानको नाममा कायम जग्गा दिलाइदिने भन्दै विभिन्न ब्यक्तिहरूलाई २ करोड रुपैयाँ ठगी गर्ने जम्बाला लामा र समुन्द्रकेशर केसीलाई पक्राउ गरी कारबाही गर्न माग गर्दै महानगरीय प्रहरी परिसर काठमाडौंमा उजुरी परेको छ । परिसरले महानगरीय प्र्रहरी बृत्त स्वयम्भु लगायतका प्रहरी कार्यालयलाई ठगीमा संलग्न लामा र केसीलाई पक्राउ गर्न वारेन्ट जारी गरेको छ ।

 

काभ्रेको रोशी गाउँपालिका–५ (साविक सिसाखानी गाविस–१)का जम्बाला लामा र काठमाडौंको दक्षिणकाली नगरपालिका वडा नम्बर ३ का समुन्द्रकेशर केसीलाई केसीले नवलपरासीको कावासोती नगरपालिका र देवचुली नगरपालिकाको गुठी संस्थानको नाममा रहेको जग्गा दिलाइदिने भनी धेरै जनालाई ठगी गरेको समाचार छ ।

 

स्रोतका अनुसार, लामा र केसीले बौद्ध जागरण केन्द्रका पूर्वअध्यक्ष सूर्य लोप्चनदेखि पूर्वसांसद प्रकाश पाख्रिनका आफन्तलाई समेत गुठीको जग्गा दिलाइदिने भनी ठगी गरेको पाइएको छ । काठमाडौं क्षेत्र नम्बर ४ का नेकपाका सांसद जीवनराम श्रेष्ठका दाजु राजाराम श्रेष्ठलाई उक्त जग्गाबाट ६ बिगाहा दिलाइदिने भनेर लामा र केसीले २८ लाख ५० हजार रुपैयाँ ठगी गरेका छन् ।

 

जुन रकम उनले ३ बर्षअघि लामा र श्रेष्ठलाई गुठीको जग्गा दिलाइदिने भनेर दिएका थिए । अहिलेसम्म उनले न जग्गा पाए, न त पैसा नै । लोप्चन र श्रेष्ठ उदाहरण मात्र हुन्, गुठीको जग्गा देखाएर लामा र केसीले नेपाली सेना, प्रहरीमा कार्यरतहरूलाई समेत ठगी गरेका छन् । एक पीडितका अनुसार नवलपरासीको उक्त गुठीको जग्गा देखाएर उनीहरूले अहिलेसम्म २ करोड भन्दा बढी ठगी गरिसकेका छन् ।

 

गुठी संस्थानका हाकिमको पनि मिलेमतो

नवलपरासीको देवचुली र कावासोती नगरपालिकामा राम लक्ष्मण सीता हनुमान गुठीको नाममा १ हजार १ सय बिगाहा जमिन छ । त्यो जमिन गुठी तैनाथी हो । त्यो जमिनको संरक्षण हुनसकेको छैन । १ हजार १ सय बिगाहामध्ये १ सय बिगाहा भन्दा बढी जग्गा अतिक्रमणमा परिसकेको छ । वस्ती बसिसकेको छ । त्यो जग्गामा नापनक्सा समेत हुन सकेको छैन । गुठी संस्थानले उक्त जग्गा नापी गरी संरक्षण गर्नसकेको छैन ।

 

उक्त जग्गामध्ये सरकारले लामो समयदेखि भोगचलन गर्दैआएकाहरूलाई दिएर बाँकी जग्गा गुठी संस्थानको नाममा नापनक्सा बनाएर संरक्षण गर्नुपर्ने हो । तर गुठी संस्थान र भूमिसुधार मन्त्रालयले संरक्षण गर्न चासो नदिएका कारण जम्बला लामा र समुन्द्रकेशर केसीहरूले विभिन्न ब्यक्तिलाई उक्त जग्गा दिलाइदिने भनेर ठगी गर्दैआएका छन् ।

 

लामा र केसीले उक्त जग्गा दिलाइदिने भनेर पचासौं जनाबाट रकम लिइसकेका छन् । उनीहरूको धन्दा नै बनेको छ । गुठी संस्थानका एक उच्च अधिकारीका अनुसार १ हजार १ सय विगाहा जग्गामध्ये कृषकहरूले लामो समयदेखि भोगचलन गर्दैआएको जग्गा उनीहरूलाई दिएर अरु जग्गा संरक्षण गर्नुपर्ने कुरा बारम्बार उठिरहेको छ । तर जग्गा संरक्षणमा कुनै पनि सरकारले चासो नदिएका कारण जटिल बन्दै गएको छ ।

 

उक्त गुठी तैनाथी जग्गाको फाइल नै बनाएर जम्बाला लामा र समुन्द्रकेशर केसीले विभिन्न ब्यक्तिबाट २ करोडभन्दा बढी ठगी गरेका छन् । राम लक्ष्मण सीता हनुमान गुठीको उक्त जग्गा गुठीको नाममा लगत कायम छ ।  जुन जग्गा गुठी संस्थानका उपप्रशासक जयप्रसाद रेग्मीले हस्ताक्षरमा लेखेको पत्रसमेत देखाएर उनीहरूले ठगी गर्दैआएका छन् । संस्थानका उपप्रशासकले लेखेको पत्र देखेपछि पैसा दिएका पीडितहरू बताउँछन् ।

 

संस्थानका उपप्रशासक रेग्मी, पूर्वप्रशासक पंचलाल महर्जन र वर्तमान प्रशासक नारायण चौधरीलाई आफूहरूले ७० लाख रुपैयाँ घुस दिइसकेकाले जग्गा छिट्टै दर्ता हुन्छ भन्दै लामा र केसीले ठगी गर्दैआएका छन् । बर्षौसम्म पनि आफ्नो नाममा जग्गा नआएपछि ठगीमा परेको चाल पाएकाहरू लामा र केसीसँग रकम फिर्ता माग्दैआएका छन् । लामा र केसीले उक्त जग्गा देखाएर पचासौं जनालाई ठगी गरेका छन् ।

 

जग्गा आफ्नो नाममा नआएपछि गुनासो गर्न गए चिप्ला कुरा गर्दै गुठी संस्थानमा सेटिङ गरिसकेकाले छिट्टै दर्ता हुने आश्वासन दिएर पठाउने गरेका छन् । लामा र केसीसँग यज्ञबहादुर शाह नामका अर्का ब्यक्ति पनि ठगीमा संलग्न रहेको स्र्रोतले बताएको छ । शाहले गुठी संस्थानका हाकिमसँग लामा र केसीको कनेक्सन गराएका थिए ।

 

गुठीको जग्गा दिलाइदिने भनेर पैसा लिएर फिर्ता नदिएकोबारेमा जम्बाला लामाले भने–‘म सानातिना फाच्चाफुच्चेहरूसँग अलमलिने मान्छे होइन, भ्रष्टाचारीहरूबिरुद्ध लेख्छु, जुनसुकै काम गर्दा पनि केही लगानी गर्नुपर्छ । मैले लगानी गरेको छु । कसैको पैसा खाएको छैन । म अहिले लुम्बिनीमा विश्वशान्तिको कार्यक्रममा छु । तपाईहरू जस्तो बुद्धिजीवीहरू यस्ता कुराका पछाडि नलाग्नुस् । भोलि भेटौं ।’

 

ठगी आरोपमा प्रहरीले वारेन्ट नै जारी गरेकोबारेमा उनले भने–‘मैले तपाईको प्रतिष्ठामा हानी पु¥याउन जे पनि गर्नसक्छु नि, त्यो वारेन्ट पनि त्यस्तै हो । मेरो प्रतिष्ठामा हानी पु¥याउन जारी गरिएको हो । तर मानवताको ब्यवहारमा जानुपर्छ । म पत्रकार सम्मेलन नै गरेर भन्नसक्छु, म कसैलाई हानी पु¥याएर एक रुपैयाँ मारेर खाएको छैन । खान्न ।’

 

गुठीको जग्गा दिने भनेर पैसा लिएर किन नमिलाएको भन्ने जिज्ञासामा उनले भने–‘त्यो प्रक्रिया अनुसार मिलाउन गुठी संस्थानले पत्र दिएको छ । गर्ने÷नगर्ने त्यहाँको नगरपालिका र गाउँपालिका र त्यहाँको जनताको कुरा हो । मेरो त्यसमा कुनै लेनादेना छैन । मेरो साथीले गरेको ठाउँमा लगानी गरिदिएको हुँ । मैले भ्रष्टाचारमा संलग्न न्यायाधीश चोलेन्द्रशमशेर राणाका  विरुद्ध अस्तिमात्र उजुरी हालेको छु । लोकमानसिंह कार्की, गोपाल पराजुली, चुडामणि शर्मा र गोपालबहादुर खड्काका बिरुद्ध म निरन्तर लाग्दैआएको छु । म जस्तो ब्यक्तिले कसरी अर्काको रकम लिन्छु ?’

 

अर्का आरोपी समुन्द्रकेशर केसीले गुठीको जग्गा मिलाउने भनेर पैसा लिएको स्वीकार गर्दै भने, धेरै समय लाग्ने भो, पैसा चाहियो भनेकाले फिर्ता दिंदैछौं । सूर्य लोप्चनजीको पनि हामी भोलि (आइतबार) नै फिर्ता गर्दैछौं । अरु केही ब्यक्तिको फिर्ता दिइसकेका छौं । पत्रिकामा समाचार निकाल्नुपर्ने जरुरी छैन । पैसा फिर्ता दिने सहमति भइसकेको छ । हामी दिंदैछौं ।’

 

गुठी संस्थानका उपप्रशासक जयप्रसाद रेग्मीले जम्बाला लामा र समुन्द्रकेसरी केसीलाई आफूले चिन्दै नचिन्ने दाबी गरेका छन् । लामा र केसीले तपाईलाई घुस दिएर कुरा मिलाइसकेकाले भन्दै पत्र देखाएर पैसा लिएकोबारेमा उनले भने–‘मैले उनीहरूलाई चिनेको छैन । बीेसौं बर्षदेखि बोर्डले गरेको निर्णयमा सही गरेर पठाएको हुँ । मैले पठाएको होइन, मैले पठाएर पठाउने होइन । लक्ष्मण ज्ञवाली संस्थानको अध्यक्ष हुँुदा गरेको निर्णयलाई सही गरेर पठाएको हो ।’ साँघु  साप्ताहिक