सम–सामयिककस्तो छ प्रधानमन्त्रीको स्वास्थ्य अवस्था ? अस्पतालले जारी गर्यो यस्तो विज्ञप्ति
त्रिवि शिक्षण अस्पतालमा उपचाररत प्रधानमन्त्री केपी शर्मा ओलीको स्वास्थ्यमा सुधार आइरहेको अस्पतालले जनाएको छ । अस्पतालले मंगलबार बिहान १० बजे विज्ञप्तिमार्फत प्रधानमन्त्रीको स्वास्थ्यमा सुधार आएको जानकारी गराएको हो ।
अस्पतालका कार्यकारी निर्देशक उत्तम कृष्ण श्रेष्ठद्वारा जारी विज्ञप्तिमा प्रधानमन्त्रीको आज विहान रगत परिक्षण तथा छातीको एक्स–रे आदीको रिपोर्टहरू सकारात्मक रहेको र स्वास्थ्यस्थिति सुधारोन्मुख रहेको उल्लेख छ ।
सोमबारदेखि प्रधानमन्त्रीको उपचारमा प्रा.डा. अरुण सायमीको संयोजकत्वमा प्रा.डा. दिब्या सिंह शाह र डा. सन्तकुमार दास सम्मिलित टोलीले उपचार गरिरहेको विज्ञप्तिमा उल्लेख छ ।
छातीमा संक्रमण भएपछि प्रधानमन्त्री ओली सोमवार विहानदेखि काठमाडौंको मनमोहन कार्डियोथेरासिक भास्कुलर तथा ट्रान्सप्लान्ट सेन्टरमा उपचाररत छन् ।
प्रधानमन्त्री ओलीको स्वास्थ्यमा सोमबार भन्दा मंगलबार सुधार भएको छ । ओलीले सोमबार बेलुका र मंगलबार बिहान झोलिलो पदार्थ खाएका छन् ।
ओलीलाई स्वासनलीको संक्रमण (रेस्पिरेटोरी ट्य्राक्ट इन्फेक्सन) भएको छ । चिकित्सकका अनुसार प्रधानमन्त्रीको स्वासनलीमा संक्रमण देखिएपनि फोक्सो, मुटु र मिर्गौलासम्म पुगेको छैन । उनलाई ७२ घन्टा अब्जरभेसनमा राखिने छ ।
दशैंको टीकाको दिनदेखि बिरामी भएका प्रधानमन्त्री ओलीलाई सोमबार बिहान ४ः३० बजे महाराजगञ्जस्थित मनमोहन कार्डियोथोरासिक भास्कुलर एन्ड ट्रान्सप्लान्ट सेन्टरमा भर्ना गरिएको हो । एक दशकअघि मिर्गौला प्रत्यारोपण गरेकाले उनलाई चाँडै संक्रमण हुने समस्या छ ।
