नेकपाको चियापान आज : भृकुटीमण्डपमा यसरी गर्दैछन ओली-दाहालले स्वागत
विजयादशमी, दीपावली, नेपाल सम्वत् र छठका अवसरमा सत्तारुढ नेपाल कम्युनिष्ट पार्टीको नेकपाले आज भृकुटीमण्डपमा चियापान कार्यक्रम आयोजना गरेको छ । तात्कालिन नेकपा एमाले र नेकपा माओवादी केन्द्रबीच एकता भई नेकपा गठन भएपछिको यो पहिलो चियापान हो ।
आजको चियापानमा सहभागी हुनका लागि प्रधानमन्त्री तथा नेकपाका अध्यक्ष केपी शर्मा ओली, अर्का अध्यक्ष पष्पकमल दाहाल, प्रचण्डले कार्ड नै पठाएर निम्तो दिनुभएको छ । आजको चियापानमा सहभागी हुने नेकपाले सार्वजनिक निम्तोसमेत दिएको छ ।
नेकपाका महासचिव विष्णु पौडेलले चियापानको पूर्वसन्ध्यामा बिज्ञप्ती ननै जारी गरी कार्ड प्राप्त हुन नसकेको अवस्थामा पनि सहभागी हुन सार्वजनिक निम्तो दिनुभएको हो ।
पौडेलले जारी गर्नुभएको विज्ञप्तिमा राज्यका सबै पक्ष, संवैधानिक निकाय, राजनीतिक दल, नागरिक समाज, कूटनीतिक क्षेत्र तथा विकासका साझेदार पक्षबीचमा एकता र आपसी विश्वास अभिवृद्धि गर्ने हुँदा चियापानमा सहभागी हुन सबैलाई आग्रह गरिएको छ ।
विज्ञप्तिमा नयाँ संविधान लागू भएर तीनै तहको निर्वाचन सम्पन्न भएपछि मुलुक सम्मृद्धिको महाअभियानतर्फ राष्ट्रिय अठोटमा हिँडिरहेको अवस्थामा सबै पक्षको सहयोगको अपेक्षा गरिएको छ ।
नेपाल बहुजातीय, बहुभाषिक, बहुसांस्कृतिक तथा बहुधार्मिक विविधताले भरिपूर्ण राष्ट्र भएको जनाउँदै विज्ञप्तिमा विविधताभित्रको एकता, आपसी सद्भाव, सहिष्णुता तथा समझदारी र सहकार्यलाई जोड दिइएको छ ।
पार्टीले विगतदेखि नै नेपालीले मनाउँदै आएका चाडबाड र सांस्कृतिक पर्वका अवसरमा ऐतिहासिक परम्परा तथा संस्कृतिको संरक्षण तथा सम्वद्र्धन गर्नु र समयानुकूल रूपान्तरण गर्दै जानु आजका दिनमा राज्य र पार्टीका दायित्व भएको भनिएको छ ।
काठमाडौँको भृकुटीमण्डपमा अपराह्न १२ बजेदेखि ५ बजेसम्म आयोजना गरिने कार्यक्रममा पार्टी अध्यक्षद्वय केपी शर्मा ओली र पुष्पकमल दाहाल‘प्रचण्ड’का नामबाट निमन्त्रणा गरिएको छ ।
नेकपा एमाले र नेकपा माओवादी केन्द्रले पार्टी एकतापछि पहिलोपटक भृकुटीमण्डपस्थित बगैँचामा गर्न लागेको चियापानमा पार्टीले करीब ५० हजारलाई निम्ता गरेको छ भने करीब ३५ हजार सहभागी हुने अनुमान गरिएको छ । कार्यक्रमलाई व्यवस्थित बनाउनका लागि ३ सय स्वयंसेवक परिचालन गरिने छ ।
