१७ जिल्लामा सहसचिवको ठाउँमा उपसचिव सिडिओ, यी हुन् सिडिओ फेरिने जिल्ला
गृह मन्त्रालयले १७ वटा जिल्लामा सहसचिव प्रमुख जिल्ला अधिकारीको ठाउँमा उपसचिवलाई जिम्मेवारी दिएको छ ।
सहसचिव दरबन्दी भएका जिल्लामा केही समयका लागि उपसचिवलाई नै सिडिओको जिम्मेवारी दिनु परेको गृह मन्त्रालयले जनाएको छ । ‘दरबन्दी घटुवा गरेको होइन, सहसचिवकै कायम छ,’ गृह मन्त्रालयका प्रवक्ता सहसचिव रामकृष्ण सुवेदीले भने, ‘सहसचिव अभाव हुँदा उपसचिवलाई सिडिओ बनाउनु परेको हो ।’
निमित्त सिडिओले मुद्दा हेर्न नमिल्ने भएकाले सहसचिव अभावमा उपसचिवलाई सिडिओ बनाइएको उनले जानकारी गराएका छन् । उनले भने, ‘जिल्लामा सिडिओ त चाहियो नि ।
कायममुकायम सिडिओ ६ महिनाभन्दा बढी राख्न मिल्दैन । त्यसैले उपसचिवलाई नै सिडिओको जिम्मेवारी दिनु परेको हो,’ उनले भने, ‘पछि सहसचिव नै पठाइन्छ ।’
अहिले कायममुकायम सिडिओ रहेकालाई नै सिडिओको जिम्मेवारी दिइएको छ । मन्त्रिपरिषद बैठकले पनि सहसचिव प्रजिअ रहने १७ जिल्लामा उपसचिव सिडिओ खटाउने निर्णय एक महिनाअघि गरेको थियो ।
तनहुँ, नवलपरासी, नवलपुर, स्याङ्जा, बाग्लुङ, उदयपुर, सिन्धुली, सिन्धुपाल्चोक, गुल्मी, बर्दिया, डोटी, बारा, सिरहा, धनुषा, महोत्तरी, सप्तरी र इलाममा उपसचिवलाई सिडिओको जिम्मेवारी दिएको हो । उपत्यकासहित ४० जिल्लामा गृहले सहसचिव सिडिओ खटाउँदै आएको थियो ।
