बलात्कारविरोधी अभियन्तालाई नोबल शान्ति पुरस्कार
यस वर्षको नोबेल शान्ति पुरस्कार कंगोका डेनिस मुकवेगे र इराककी याजिदी समुदायकी नादिया मुरादले संयुक्त रूपमा पाउने घोषणा शुक्रवार भएको छ ।
मुकवेगेले आफ्नो पूरै जिन्दगी युद्धका बेलामा यौन हिंसामा परेका महिलाको प्रतिरक्षामा बिताएका छन् ।
त्यस्तै मुरादले आफूविरुद्ध तथा अन्यविरुद्ध भएका यौन दुर्व्यवहारका कथाहरू बताउने गरेकी छन् । याजिदी समुदायकी मुरादलाई उत्तरी इराकमा रहेको उनको गाउँमा आईएसका आतंकवादीहरूले अपहरण गरेर यौनदासी बनाएर राखेका थिए ।
मुरादले यसअघि युरोपेली संघको साखारोभ मानवअधिकार पुरस्कार सन् २०१६ मा पाएकी थिइन् । युरोपेली परिषद्को भाक्लाभ हाभेल मानवअधिकार पुरस्कार पनि उनले पाएकी थिइन् ।
नोबेल शान्ति पुरस्कार जित्ने दुवैजनाले आफ्नो व्यक्तिगत सुरक्षालाई जोखिममा राखेर युद्धअपराधविरुद्ध लडाईं गरिरहेको तथा पीडितलाई न्याय दिलाउन लागिपरेको नोबेल समितिले उल्लेख गरेको छ ।
