प्रचण्ड र ओलीको कुरा नमिलेपछि २१ गते सचिवालय बैठक
नेपाल कम्युनिष्ट पार्टी (नेकपा)को सचिवालय बैठक आगामी आइतबार (२१ असोज २०७५) बस्ने भएको छ । अध्यक्षद्वय प्रधानमन्त्री केपी शर्मा ओली र पुष्पकमल दाहाल ‘प्रचण्ड’बीचको २ घन्टा छलफलपछि नेकपाले सचिवालय बैठक बोलाउने निर्णय गरेको हो ।
असोज २१ गते आइतबारलाई सचिवालय बैठक बोलाएको महासचिव विष्णु पौडेलले बताए । प्रधानमन्त्री समेत रहेका नेकपा अध्यक्ष ओलीलाई भेट्न प्रचण्ड शुक्रबार बिहान बालुवाटारस्थित प्रधानमन्त्री निवास पुगेका थिए ।
१२ दिने अमेरिका भ्रमणपछि बिहीबार स्वदेश फर्किएका प्रधानमन्त्री र पत्नी सीताको उपचार गरेर बुधबार सिंगापुरबाट फर्किएका अध्यक्षद्धयबीच पार्टीभित्र बढेको असन्तुष्टिको बिषयमा छलफल भएको थियो ।
पछिल्लो समयमा वरिष्ठ नेता सचिवालयको निर्णयप्रति असन्तुष्ट छन् । नेपाल अफ्रिका सम्मेलनमा सहभागी हुन घाना गएका बेला असोज ५ गते बसेको सचिवालय बैठकले प्रदेश इन्चार्ज र अध्यक्ष चयन गरेको थियो । पार्टी अध्यक्षसमेत रहेका प्रधानमन्त्री ओलीले विदेश भ्रमणमा गएका बेला कुनै निर्णय नगर्ने वचन दिएर तोडेको भन्दै नेपाल असन्तुष्ट भएका हुन् ।
यो सँगै नेकपा भित्र खासगरी पूर्व एमाले समुहभित्र तिव्र विवाद देखिएको छ । प्रधानमन्त्री ओली र नेता नेपालको पक्ष विपक्षमा सार्वजनिक रुपमा नै बिरोध र समर्थन जारी छ ।
जेठ ३ गते पार्टी एकता भएपछि असार २१ गते एकपटक मात्र नेकपाको स्थायी समिति बैठक बसेको छ । तर, त्यसयता स्थायी कमिटि बस्न सकेको छैन । गत १२ असोजमा दुबै अध्यक्ष देशबाहिर रहेको बेला स्थायी कमिटिको अनौपचारिक भेला बोलाएका थिए । चियापान नाम दिइएको भेलामा शिर्ष नेताहरु पनि उपस्थीत थिए ।
