नेकपा प्रवेश गर्न लागेका ठाकुर पुनः राजपा फर्किए, अध्यक्ष बन्ने महतोको कसरत

 

प्रतिनिधिसभा सदस्यमा टिकट नपाएर राजपा छाडेका राजपाका ततकालीन सह-महासचिव जयप्रकाश ठाकुर एघार महिनापछि पुनः पुरानै घर फर्केका छन् ।

 

राजपा अध्यक्ष मण्डलका सदस्य राजेन्द्र महतोको विशेष प्रयासमा ठाकुर पुनः राजपा फर्केका हुन् । राजविराजमा बुधवार बिहान पत्रकार सम्मेलनको आयोजना गरी महतोले ठाकुरलाई राजपामा प्रवेश गराएका छन् ।

 

ठाकुर राजपामा प्रवेश गरेको तस्बिरसहितको खबर सामाजिक सञ्जालमार्फत जानकारी मिलेपछि नेकपा सप्तरीका नेताहरु आश्चर्यचकित भएका छन् । किनकि, केही महिनाअघि मात्र नेकपा सप्तरीका नेताहरुले ठाकुरलाई आफनो पार्टीमा भित्रयाउन पार्टी अध्यक्ष प्रचण्डसँग भेट गराई सामाजिक सञ्जालमार्फत सार्वजनिक समेत गरेका थिए ।

 

गत वर्ष मंसिरमा सम्पन्न प्रतिनिधिसभाको निर्वाचनमा सप्तरीको संसदीय क्षेत्र न.२ बाट टिकट नपाएपछि ठाकुरले राजपाबाट बिद्रोह गरी राजपाले सर्मथन गरेका फोरम अध्यक्ष उपेन्द्र यादवविरुद्ध स्वतन्त्र उम्मेदवारी दिएका थिए ।

 

ठाकुरको उम्मेदवारीपछि फोरम राजपाको गठबन्धन नै खतरामा परेको महसुस गरिएको थियो । त्यसपछि उपेन्द्र यादवको दबाबमा ठाकुरलाई राजपाले साधारण सदस्यबाट समेत निष्कासन गरेको थियो ।

 

फोरम राजपा गठबन्धन र बाम गठबन्धनबाट यादव समुदायकै उम्मेदवार रहेको फाइदा उठाउन खोजेका ठाकुरले १० हजार मतसहित तेस्रो स्थानमा चित बुझाउनु परेको थियो । तर बाम गठबन्धनका उम्मेदवार तथा पूर्वमन्त्री उमेश यादवले जत्तिकै मत ल्याउन ठाकुर सफल भएका थिए ।

 

दुई जना यादव उम्मेदवार रहेकाले यादव मत बाँडिने र त्यसबाहेकका जातीको मत यादवविरुद्ध तानेर जित्ने दाउमा रहेका ठाकुरको सपना त्यतिखेर चकनाचुर हुन गयो जब उपेन्द यादव राष्ट्रिय अध्यक्ष रहेकाले जातीय आधारमा मतदान नगरी यादवलाई जिताउनैपर्ने माहोल बन्यो ।

 

यादवलाई जिताए ०५६ को आम निर्वाचनमा सोही क्षेत्रबाट पराजित भएका ततकालीन नेपाल सद्भावना पार्टीका राष्ट्रिय अध्यक्ष गजेन्द्र नारायणसिंहको पराजयको प्रायश्चित समेत हुने सेन्टिमेन्ट निर्वाचनताका फैलिएको थियो । जुन सेन्टिमेन्ट यादवको सहज जितमा संजिवनी बुटी सावित भएको थियो ।

 

पत्रकार सम्मेलनमा सँगै उपस्थित रहेका ठाकुर भने मौन रहेका थिए । पत्रकार सम्मेलनपछि पनि सञ्चारकर्मीहरुले उनको मौनता तोड्न खोजेपछि उनले यति मात्र भने- ‘पछि कुरा गर्छु ।’

 

पत्रकार सम्मेलनमा बोल्दै महतोले तत्कालिन समयमा मधेशी जनताको भावनाअनुसार फोरमसँग चुनावी गठबन्धन गर्नु परेकोले आफ्नै पार्टीका धेरै साथीहरुलाई टिकट दिन नसकेको बताए ।

 

उनले विगतमा पार्टीबाट भएको त्रुटिका लागि दुःख मनाउ गर्नु नपर्ने भन्दै ठाकुरजीलाई घर फिर्ता गराइयो, अब उचित स्थानसमेत दिनेछौँ भने ।

 

चुनावका बेला पार्टीबाट बिद्रोह गरी गठबन्धनका विरुद्ध उम्मेदवारी दिने आफ्ना सबै नेता कार्यकर्तालाई घर फिर्ता हुन आह्वान पनि सो अवसरमा महतोले गरे ।

 

सरकारले संविधान संशोधन नगरेको आरोप लगाउँदै महतोले चाडबाड सकेपछि संविधान संशोधन गराउन सडक आन्दोलनमा जाने चेतावनी समेत दिए ।

 

यसैबीच महाधिवेशनको तयारीमा जुटिरहेको बेला राजपाका अध्यक्ष मण्डलका सदस्य महतो महाधिवेशनमा आफू अध्यक्ष बन्ने कसरतमा लागेको श्रोतले जनाएको छ । उनी यतिखेर अध्यक्ष मण्डलका संयोजक महन्थ ठाकुरको नजिकका नेता कार्यकर्ता र पार्टीबाट कारबाहीमा परेकाहरुलाई पुनः पार्टीमा भित्रयाएर आफू अध्यक्ष बन्ने बाटो बनाउन लागेको श्रोतको दाबी छ ।

 

बिगतमा पनि महतोको यस्तो चरित्र देखा नपरेको होइन । जन आन्दोलन-२ पछि दरबार पसेका बद्री मण्डल नेतृत्वको नेपाल सद्भावना पार्टी र जनआन्दोलन-२ मा सक्रिय भूमिका निर्वाह गरेको तत्कालिन नेपाल सद्भावना पार्टी आनन्दीदेवीको नाटकीय रुपमा एकीकरण गराई उनी पार्टीमा हाबी भएका थिए । जसको परिणामस्वरुप सो पार्टी विभाजित हुदै अन्ततः समाप्त नै हुन पुग्यो ।