वामदेव गौतमका लागि निर्वाचन क्षेत्र छोड्न नेकपाका कुनै पनि सांसद तयार नभएपछि गौतमको संसद् प्रवेश अभियानमा पूर्णविराम लागेको छ । अब भवितव्यवश कुनै निर्वाचन क्षेत्र स्वतः खाली भएमा मात्र वामदेवले मौका पाउने स्थिति बनेको छ ।

 

शुरुमा ललितपुरको दक्षिणी क्षेत्रबाट निर्वाचित नवराज सिलवाललाई राजीनामा गराएर त्यहीँबाट चुनाव लड्ने सोच बनाएका वामदेव नवराजसँग कुरै नगरीकन पछि हटेका थिए ।

 

ललितपुरबाट निर्वाचनमा विजयी बन्न नसकिने देखिएपछि गौतम पछि हटेको बताइन्छ । त्यसपछि छोरा हरिश गौतमका साथी रहेका डोल्पाबाट विजयी सांसद धनबहादुर बुढालाई छोरामार्फत कन्भिन्स गराइयो । बुढाले सांसद पद छोड्न आफू मन्त्री बन्नुपर्ने सर्त राखेपछि वामदेवले आफ्नो कोटाबाट उनलाई राज्यमन्त्री बनाइदिएका थिए ।

 

पूर्वसर्तबमोजिम बुढाले भदौ १५ गते नै सांसद पदबाट राजीनामा दिइसक्नुपर्ने थियो । विभिन्न कारणले राजीनामा नदिएपछि यतिबेला वामदेवले धनबहादुरबाट धोखा भएको ठानेका छन् । धनबहादुरले धोखा दिएपछि वामदेवले दर्जनौँ सांसदहरूलाई भेटी आफ्नो लागि ठाउँ खाली गरिदिन आग्रह गरिसकेका छन् ।

 

राजेन्द्र राईदेखि कञ्चनपुरका दीपकप्रकाश भट्ट र दैलेखका रवीन्द्रराज शर्मा, बाँकेका नन्दलाल, प्यूठानकी दुर्गा पौडेल, बझाङका भैरवबहादुर सिंहलगायत दर्जनौँ सांसदलाई वामदेवले गरेको आग्रह खेर गएको छ ।

 

अहिले राजीनामा दिने सांसदलाई डेढ वर्षपछि ६ वर्षका लागि राष्ट्रिय सभा सदस्यका साथै मन्त्री बनाइने ‘बम्पर अफर’ गर्दा कोही पनि आकर्षित नभएपछि कतिपय सांसदलाई नगदसमेत ‘अफर’ गरेको बुझिएको छ ।

 

करिब दुई करोड नगद अफर गर्दा पनि सांसदहरू वामदेवका लागि सिट छोड्न तयार भएनन् । त्यसैले अब वामदेवको सांसद बन्ने योजनामा पूर्णविराम लागेको छ । कुनै अप्रत्यासित र विशिष्ट स्थिति सिर्जना भएको अवस्थामा बाहेक संसद्को विद्यमान कार्यकालभित्र गौतम सांसद नबन्ने निश्चितप्रायः भएको छ ।

 

अस्पताल मासेर सपिङ मल !

राज्यको सम्पत्तिमा चरम ब्रह्मलुटको क्रम चलिरहँदा चितवनमा अर्को खतरनाक योजना बन्दै गरेको समाचार घटना र विचारलाई प्राप्त भएको छ । भरतपुरबाट प्राप्त जानकारीअनुसार त्यहाँ स्थिति बीपी कोइराला क्यान्सर अस्पतालको ६ बिघा जमिनमा सपिङमल बनाउनेबारे नगरप्रमुख रेणु दाहालले भित्रभित्रै सक्रियता दर्शाएकी छिन् ।

 

९९ वर्षका लागि ‘कुनै कम्पनी’लाई क्यान्सर अस्पतालको ६ बिघा जग्गा उपलब्ध गराउने र उक्त जग्गामा एक भव्य सपिङ मल बनाउने योजनालाई कार्यान्वयन गर्न विभिन्न व्यक्तिहरू सक्रिय भएका छन् । प्रधानमन्त्री केपी शर्मा ओली र नेपाली काङ्ग्रेसका नेताहरूले साथ दिएमा आगामी दुई वर्षभित्रै अस्पतालको जमिनमा भव्य सपिङमल बन्ने निश्चित मानिन्छ ।

 

खास व्यापारीहरूसँग कुराकानी गरेर प्रचण्डले सपिङमल बनाउने अभियानमा उत्साह थपेका छन् । तर, सपिङमलमा प्रचण्डको कति लगानी अर्थात् सेयर रहने हो र मीनबहादुर गुरुङको नामसमेत यसमा सामेल गरिने हो या होइन, सो स्पष्ट हुन सकेको छैन ।

 

प्रचण्डलाई प्रधानमन्त्री केपी शर्मा ओली र काङ्ग्रेसका नेताहरूले यस योजनामा सहयोग पुऱ्याउने विश्वास अहिलेसम्म गरिएको छैन । तर, प्रचण्डका ‘बाबुछोरी’ भने अस्पतालको जग्गामा सपिङमल बनाइछोड्ने दृढविश्वासमा रहेका छन् ।घटना र विचारबाट