प्रचण्डकी बुहारी बिना मगरको मन्त्रालयमा शृङखलाबद्ध अनियमितता, मन्त्रालयका हाकिम नै पानी तस्करीमा!
खानेपानी तथा सरसफाई मन्त्रालयमा श्रृङखलाबद्ध रुपमा अनियमितता हुने गरेको पाइएको छ । खानेपानी संस्थानका लागि पाइप लगायत विभिन्न समान खरिदमा मन्त्रालयको कर्मचारीको मिलेमतोमा अनियमितता भएको खबर बाहिर आइरहेका बेला सोही मन्त्रालय अन्तरगतको अर्को गम्भीर अनियमितता भएको बाहिर आएको हो ।
पछिल्लो सयम खानेपानी मन्त्रालय मातहतका निकायका हाकिमहरु पानी तस्करीमा लागेको खुल्नमा आएको छ । यसरी पानी तस्कारीमा लाग्ने मन्त्रालय मातहतका निकाय सुदूरपश्चिम क्षेत्रीय खानेपानी आयोजना र मेलम्ची खानेपानी परियोजनाका हाकिमहरु रहेका छन् ।
सुदूरपश्चिम क्षेत्रीय खानेपानी आयोजनाका निर्देशक प्रदीप मुडवरी र मेलम्ची खानेपानी परियोजनाका कार्यकारी निर्देशक सुर्य कंडेलले श्रीमतीको नाममा पानी कम्पनी दर्ता गराएर पानीको विक्री गर्ने गरेको स्रोतले बताएको छ ।
उनीहरुले पानीको बोतल तथा जारमा पानी हालेर बिक्री गर्दै आएका छन् । सरकारी कर्मचारीले यसरी पानीको बोतल र जारमा पानी हालेर विक्री गर्नु एक किसिमको तस्कारी नै रहेको उपभोक्ता अधिकारकर्मीहरुले बताएका छन् ।
स्रोतका अनुसार उनीहरुले एक आइटी कलेज सञ्चालक सुरेन्द्र अधिकारीसँगको सहकार्यमा बोतलको पानीमा लगानी गरिरहेका छन् ।
त्यस्तै खानेपानीबाटै अवकाश पाएका ईञ्जिनियर केशवराज विष्टहरुलाई समेत आफ्नो पानी व्यवसायमा सामेल गराएको स्रोतको दावी छ ।
तर, उनीहरु तीनै जनाले आफुहरु पानीमा लगानी नगरेको दावी गर्दै आएको बताइएको छ ।
दुर्गन्धित पानी पिउन बाध्य छन, बाढीपीडित
सप्तरी हनुमाननगरका स्थानीयवासी अशुद्ध पानी पिउन बाध्य भएका छन् ।
हालै आएको बाढीबाट प्रभावित हनुमाननगर कङ्कालनी नगरपालिका र तिलाठी कोइलाडी गाउँपालिकाका झण्डै ५०० घरपरिवार दुर्गन्धित पानी पिउन बाध्य भएका हुन् ।
घर आँगनमा बाढी पसेपछि त्यहाँ रहेका ट्युबेलको पानीमा अहिले लेदो आउन थालेपछि उनीहरु स्वच्छ पानी पिउनबाट वञ्चित भएको स्थानीयवासी आकाश यादवले बताउनुभयो ।
ट्युबेलमा लेदो र दुर्गन्धित पानी आउन थालेपछि त्यहाँका हजारौँ वासिन्दा त्यही पानी पिउन बाध्य भएको बाढीपीडित राम सदाले बताउनुभयो । दुर्गन्धित पानी खाएकै कारण अहिले सो क्षेत्रका वासिन्दा बिरामी पर्न थालेको बताइएको छ ।
दुर्गन्धित पानी पिउने गरेका कारण अहिले बाढीपीडितमा झाडापखाला, निमोनिया, रुघाखोकी, आँखा पाक्ने र घाँटी दुख्नेजस्ता रोगहरु देखिएको उहाँले बताउनुभयो ।
