नेपाल प्रहरीमा इन्सपेक्टरदेखि खेलाडीसम्म भर्ना खुल्यो, कुन पदमा कति ?
नेपाल प्रहरीमा प्रहरी निरीक्षक (इन्सपेक्टर) देखि खेलाडीसम्म भर्ना खुलेको छ ।
प्रहरी प्रधान कार्यालयले सोमबार प्रकाशन गरेको भर्नासम्बन्धी सूचना अनुसार समावेशी प्रावधान अनुसार पदपूर्ति गर्नेगरी १०८ जना प्रहरी निरीक्षक (इन्सपेक्टर) माग गरिएको छ । समावेशी समूह र अमर प्रहरी बाहेक ५८ जना प्रहरी निरीक्षक खुल्ला तर्फबाट पदपूर्ति गरिने बताइएको छ ।
जुनियर अफिसरतर्फ ५२४ जना प्रहरी सहायक निरीक्षक (असई) मा भर्ना खुलेको छ ।
जनपदतर्फको असई पदमा २८३ जना खुल्ला तर्फबाट र बाँकी समावेशी समूहबाट पदपूर्ति गरिने प्रहरी प्रधान कार्यालयले जनाएको छ ।
सातवटा प्रदेश प्रहरी कार्यालय र महानगरीय प्रहरी कार्यालय रानीपोखरीबाट असोज १८ गतेदेखि कार्तिक २९ गतेसम्म दरखास्त फारम भर्न प्रहरी प्रधान कार्यालय भर्ना छनौट शाखाले जनाएको छ ।
प्रहरी प्रधान कार्यालयले ६ हजार २४४ जना जवान पदमा भर्ना आह्वान गरेको छ । प्रहरी कार्यालय सहयोगी (भान्से) ३२० जना, हजाम १५ जना, सिलाईबुनाई तर्फ १२ जना, कुचिकार १४ जना, मोची ९ जना र खेलाडी ३० जनाको दरखास्त आह्वान गरिएको प्रहरी प्रधान कार्यालयले जनाएको छ ।
