निर्मला हत्याको प्रश्नले विदेशमा पनि छोडेन प्रधानमन्त्री ओलीलाई, भने ‘हरेक व्यक्तिको पछाडि प्रहरी त लाग्दैन सक्दैन नि’
प्रधानमन्त्री केपी शर्मा ओली अहिले अमेरिका हुँदै कोस्टारिका पुगेका छन् । विदेश भ्रमणमा भए पनि प्रधानमन्त्री ओली नेपालमा विकास भइरहेका सबै घटनाप्रति अपडेट छन् र हुने नै भए ।
विदेश भ्रमणमा भए पनि प्रधानमन्त्री केपी शर्मा ओलीमाथि कञ्चनपुरकी बालिका निर्मला पन्तको बलात्कारपछिको हत्याको घटनाले पच्छ्याइरहेको छ । उनलाई विदेशस्थित नेपालीहरुले र नेपाली मिडियाहरुले समेत निर्मला पन्तको हत्या घटनालाई जोडेर निर्मला हत्या प्रकरणको पछिल्लो प्रगतिका बारेमा प्रश्नहरु सोध्न बिर्सिएका छैनन् ।
निर्मला हत्याको घटना अनुसन्धानका क्रममा विवादित बनेपछि निलम्वित एसपी डिल्लीराज विष्ट, उनका छोरा किरण र कञ्चनपुरका मेयर सुरेन्द्र विष्टका भतिज आयुष विष्टको डिएनए रिपोर्ट सार्वजनिक भएपछि निर्मलाका बाबु–आमा, कञ्चनपुरबासी र देशबासीसँगै प्रधानमन्त्रीको धारणा समेत बाहिर आएको छ ।
विदेशबाटै प्रधानमन्त्री केपी शर्मा ओलीले निर्मला हत्या प्रकरण र अनुसन्धानको प्रगतिबारे मुख खोलेका छन् ।
अमेरिकामा अन्तरवार्ता दिने क्रममा प्रधानमन्त्री ओलीले निर्मला हत्याको प्रश्नको सामना गर्दै बलात्कार र हत्या सरकारले गरेको नभएको बताउँदै यस्ता घटनामा अपराधीहरु पत्ता लाग्न कहिलेकाँही १२ वर्षसम्म पनि लाग्न सक्ने बताएका छन् । प्रधानमन्त्री ओलीले भनेका छन्, ‘हरेक व्यक्तिका पछाडि प्रहरी लागेर साध्य हुने कुरा होइन ।
सरकारले निर्मलाको हत्यारा पत्ता लगाउन सकेन होला, किनभने अपराध गर्नेले सूचना दिएको हुँदैन । दशी छोडेको हुँदैन ।’ उनले भनेका छन्, ‘तर, यस घटनाप्रति सरकार गम्भिर छ, सरकार र प्रहरीले अपराधी पत्ता लगाउन सबैखालका प्रयास जारी राखेको छ । अपराधी पत्ता लगाएरै छाड्छौं ।’
