नारायणकाजीले भने, यो सरकारको बिकल्पको कल्पना गर्नु पनि गलत
नेकपा नेता नारायणकाजी श्रेष्ठले पार्टी अध्यक्ष केपी शर्मा ओली नेतृत्वको सरकारको बिकल्पको सोच देश, जनता, पार्टी र आन्दोलनको पक्षमा नभएको प्रष्ट पार्नुभएको छ ।
संयुक्त राष्ट्रसंघीय महासभामा सहभागि हुन प्रधानमन्त्री न्युर्योकमा रहेका बेला बरिष्ठ नेता माधवकुमार नेपालको नेतृत्वमा काठमाडौं अनौपचारिक भेटवार्तापछि श्रेष्ठको यो धारणा आएको हो । बरिष्ठ नेता नेपालले असोज ११ गते संसदमा देश डुब्न लागेको भन्दै सरकारप्रति असन्तुष्टी राख्नुभएको थियोभने भोलिपल्ट स्थायी समितिको अनौपचारिक भेला गर्नुभएको थियो ।
नेता श्रेष्ठले भने पार्टीको सामान्य बिषयमा भएको छलफललाई अतिरञ्जित ढँगले प्रचार गर्नुको कुनै अर्थ नरहेको बताउँदै सरकारको बिकल्पवारे सोच्न नसकिने प्रष्ट पार्नुभएको हो ।
‘हाम्रो पार्टीको सामान्य बिषयमा भएको छलफललाई अतिरञ्जित ढँगले प्रचार गर्नुको कुनै अर्थ छैन’ उहाँले आइतवार ट्वीट गर्दै भन्नुभएको छ – ‘सामाजिक न्याय सहितको समृद्धिको तात्कालिन लक्ष्य र समाजवादको दीर्घकालीन लक्ष्यलाई केन्द्रमा राखेर सबै नेपाली कम्युनिष्टहरुलाई एउटै पार्टीमा गोलबन्द गर्न बनेको नेकपाको एकता सुदृढ हुनेछ । भ्रममा नपरौं ।’
उहाँले सरकारमाथि गरिएका आलोचना र टिप्पणी सरकारलाई प्रभावकारी बनाउन गरिएको पनि बताउनुभयो । ‘बर्तमान सरकारप्रतिको आलोचना (टिप्पणी) सरकारलाई थप प्रभावकारी एवं सफल बनाउने उदेश्यले हुनुपर्छ’ उहाँले भन्नुभएको छ,‘ यतिबेला यो सरकारको बिकल्पको सोच देश,जनता,पार्टी र आन्दोलनको पक्षमा हुँदैन।अहिले त्यस्तो कल्पना गर्नु पनि गलत हुन्छ । कसैले त्यस्तो सोचेका छन् जस्तो पनि लाग्दैन ।’
