गृहमन्त्री रामबहादुर थापा बादलको मन्त्री पद धरापमा
पहिले विवादमा तानिएर व्यर्थमै पूर्व कानुन मन्त्री शेरबहादुर तामाङ्गले राजीनामा दिनुपर्यो । अब यही रवैया हो भने गृहमन्त्री बादल दोस्रो नम्बरमा पर्न बेर छैन ।
पूर्व कानुन मन्त्री तामाङ्गले बंगलादेशमा चिकित्सा पढ्न जाने नेपाली महिला विद्यार्थीले यौन सम्झौता गर्नुपर्ने विवादित भनाइ राखेर खाइआएको मन्त्री पदबाट हात धुनुपरेको थियो ।
उनलाई हटाउन नेकपाको एक खेमा नै लागेको थियो । अब पालो बादलको आउला जस्तो छ । उनले अचम्मसंग नाटक गर्न थालेका छन् ।
बादलले बलात्कार, हत्या जस्ता जघन्य अपराधका दोषीलाई कार्वाही गर्नु त कता हो कता उल्टै अपराधी र ठगलाई कारवाही गरेकै कारण सरकारलाई घेराबन्दी गर्ने काम भएको बताएका छन् ।
दुई तिहाइको सरकारलाई कहाँबाट घेराबन्दी ? के हत्यारा र बलात्कारी जति विपक्षी दलका ?
कञ्चनपुरकी १३ वर्षे बालिका निर्मला पन्तका हत्यारालाई कार्वाही गर्न जताततैबाट दवाव छ । मन्त्री बादलले अन्टसन्ट जवाफ दिइरहेका छन् ।
निर्मला हत्याबारे चाहिँदो नचाहिँदो जवाफ दिएकै कारण गत बिहीबार संसदमै उनको राजीनामा मागिएको थियो ।
यदि उनले कार्वाही गर्न सकेनन् भने यो जगतले यसको दोषी बादललाई पनि ठहर्याउने छ । बादलले भनेका छन् – ‘सरकारले देशमा व्याप्त भ्रष्टचार, बलात्कार, तस्करी र ठगलाई नियन्त्रण गरी कारवाहीको दायरामा ल्याएकाले अपराधी जर्मुराएका हुन्, ‘यसैले पनि सरकार गिराउने ठूलो षड्यन्त्र र खेल हुँदैछ ।’
यदि उनले भनेको साँचो हो भने यो सरकार गिराउने एक मात्र दल नेकपा नै हुनेछ । ती अपराधी र बलात्कारी जति नेकपाकै हुन् भन्ने आसय मन्त्री बादलको हो ।
विभिन्न खाले गतिविधिले अपराधीमाझ सरकार कडा रुपमा प्रस्तुत भएकै कारण सरकारलाई गिराउने षड्यन्त्र भइरहेको थापाको जिकिर छ । निर्मला काण्डमा पनि नेकपाकै सात नम्बर प्रदेशका इन्चार्ज भीम रावलले सुरुवातमा अवरोध गर्न खोजेका थिए ।
त्यसपछि प्रधानमन्त्री केपी शर्मा ओलीले बोले । अनि नेकपाका अध्यक्ष पुष्पकमल दाहाल प्रचण्डले बोलेका थिए । भनेपछि उनीहरु अपराधमा परोक्ष रुपमा सरोकार राख्छन् ।
हुँदाहुँदा बादलले बलात्कारको कारण पूँजीबाद भन्न थालेका छन् । अलिकति लाज लाग्दैन भने उनले नै हतियार उठाएको सशस्त्र द्धन्द्धको समयलाई ख्याल गरे पुग्छ ।
यौनमा लिप्त उनका कार्यकर्तालाई सोधे हुन्छ । कति जनाको त सांस्कृतिक विवाह नै गराइएको थियो ।
के ती उनका कार्यकर्ता पनि पूँजीवादी थिए ?
सरकारमा रहन र पदको मर्यादा पालना गर्न अक्षम भइसकेपछि बोल्ने भाषा बादलले बोलिरहेका छन् ।
साँचो अर्थमा उनलाई काम गर्न कसैले पनि रोकेको छैन । काम गर्न नसकेको हो । काम गर्न नसक्ने हो भने जनतालाई धेरै अल्झाएर राख्नु हुन्न । कुर्सी छाडे हुन्छ ।
बादलका पछिल्ला भनाइले उनलाई उनकै पार्टीबाट काम नगर्न दवाव आइरहेको स्पष्टै हुन्छ । जब आफ्नै पार्टीले काम गर्न दिएन भने त राजीनामा दिँदा नै उत्तम हुन्छ ।
कतै बादल राजीनामा गर्ने दोस्रो मन्त्री बन्ने त हैनन् ?
तर गृहमन्त्री ज्यू खुलेर भन्दा राम्रो –काम गर्न नदिएको सत्ताधारीले कि विपक्षीले ?
