असंलग्न अभियान शान्तिको संस्कृति : परराष्ट्रमन्त्री ज्ञवाली
परराष्ट्रमन्त्री प्रदीपकुमार ज्ञवालीले असंलग्न अभियानको सिद्धान्तले यसका सदस्यहरूलाई शान्तिको संस्कृतितर्फ अभिप्रेरित गर्ने बताउनुभएको छ ।
संयुक्त राष्ट्र सङ्घको मुख्यालयको अति कम विकसित मुलुकहरूको मन्त्रिस्तरीय बैठकमा आज सहभागी हुँदै मन्त्री ज्ञवालीले उक्त कुरा बताउनुभएको संयुक्त राष्ट्र सङ्घका लागि नेपाली स्थायी नियोगले आज जारी गरेको एक विज्ञप्तिमा उल्लेख गरिएको छ ।
बैठकमा उहाँले यस अभियानका सदस्यहरूले एकतामा आबद्ध भई कसैलाई पनि पाखा नपारी शान्त विश्व निर्माण गर्न योगदान गर्नुपर्नेमा जोड दिनुभयो ।
मन्त्री ज्ञवाली आजै अति कम विकसित मुलुकहरूको मन्त्रिस्तरीय बैठकमा पनि सहभागी हुनुभयो । उक्त बैठकमा उहाँले गरीबी, असमानता, बेरोजगारी, मौसम परिवर्तन, प्राकृतिक प्रकोप तथा आन्तरिक द्वन्द्व अति कम विकसित मुलुकका प्रगतिमा बाधा भएको बताउनुभयो ।
उहाँले अति कम विकसित मुलुकको विकासको मार्ग मन्द, लामो, व्यापक अर्थ लाग्ने भएको बताउँदै ती मुलुकको आन्तरिक प्रयासलाई सहयोग गर्न पर्याप्त अन्तर्राष्ट्रिय सहयोग आवश्यक भएको उल्लेख गर्नुभयो ।
यसैगरी परराष्ट्रमन्त्री ज्ञवाली आज भियतनामको स्वतन्त्रता दिवसका अवसरमा आयोजित स्वागत समारोहमा सरिक हुनुभयो । उहाँले भियतनामका हालै दिवङ्गत हुनुभएका राष्ट्रपति त्रान दाई क्वानप्रति हार्दिक श्रद्धाञ्जलि व्यक्त गर्नुभयो ।
मन्त्री ज्ञवालीले आजै दिगो विकासका लक्ष्य कार्यान्वयनमा चीनले गरेको योगदानको प्रदर्शन अवलोकन गर्नुभयो । उक्त प्रदर्शन चिनियाँ विदेशमन्त्री वाङ यीले आयोजना गर्नुभएको हो ।
यसैगरी परराष्ट्र मन्त्रालयका सचिव शङ्करदास वैरागीले पारमाणविक हतियार पूर्ण अन्त्य दिवस मनाउन आयोजना गरिएको एक समारोहलाई सम्बोधन गर्नुभयो । उहाँले नेपालले आम विनाशकारी हतियारका साथै अन्य हतियारको निःशर्त अविस्तारको सिद्धान्त अवलम्बन गरेको बताउनुभयो ।
