महाअभियोगको चर्चासँगै दीपकराज जोशी पुनः घरविदामा

 

 

आफू विरुद्ध महाअभियोग लगाउन सत्तारुढ नेकपाका सांसदहरुको हस्ताक्षर संकलन भएका बेला सर्वोच्च अदालतका वरिष्ठ न्यायाधीश दीपकराज जोशी पुनः घरविदामा बसेका छन् ।

 

संसदीय सुनुवाई विशेष समितिबाट प्रधानन्यायाधीशमा अस्वीकृत भएपछि जोशी लामो घरविदामा बसेका थिए ।

 

ओमप्रकाश मिश्र प्रधानन्यायाधीश नियुक्त भएपछि सर्वोच्च फर्किएका जोशीले केही दिन इजलास पाएका थिएनन् । तर कानुनमन्त्री तथा न्यायपरिषद सदस्य भानुभक्त ढकालसँगको गोप्य सहमतिपछि उनलाई इजलास दिइएको स्रोतको दावी छ ।

 

जोशीले सो गोप्य सहमतिअनुसार राजीनामा नदिएपछि उनीविरुद्ध महाअभियोग लगाउन नेकपाका सांसदहरुको हस्ताक्षर संकलन भइसकेको छ । जोशीले सर्वोच्चमा फर्केर इजलास पाएपछि आफू राजीनामा दिएर बाहिरिने वचन तोडेको दावी सत्तापक्षका नेताहरुको छ ।

 

शैक्षिक प्रमाणपत्र नक्कली र विवादस्पद फैसलाहरुलाई कारण देखाउँदै जोशीलाई संसदले अस्वीकृत गरेको थियो । उनले राजीनामा नदिए महाअभियोग दर्ता गर्ने भनिएका बेला जोशी शुक्रबारसम्मका लागि विदामा बसेको स्रोतले जनाएको छ ।

 

यद्यपी जोशी निकट स्रोतले भने उनी सोह्रश्राद्धमा पितृ श्राद्ध गर्न घरविदामा बसेको र शुक्रबारपछि पुनः अदालत फर्किने दावी गरेको छ । जोशीले राजीनामा नदिने स्रोतको दावी छ । कांग्रसले जोशीविरुद्ध महाअभियोग नलगाउन सत्तापक्षलाई चेतावनी दिएको छ ।