सशस्त्रको जग्गा खरिदमा ४ करोड भ्रष्टाचार
सशस्त्र प्रहरी बलका विगतका चार पूर्व आइजीपीहरुमाथि पदीय दुरुपयोग गरी भ्रष्टाचार गरेको कहिल्यै नमेटिने कालो धब्बा लागेको छ । विगतमा ती चार आइजीपीले जुन ढंगले भ्रष्टाचार गरेका थिए, वर्तमान आइजीपी शैलेन्द्र खनालले उनीहरुकै पदचाप पछ्याउन थालेका छन् ।
सशस्त्र प्रहरी अस्पतालका लागि जग्गा खरिद गर्दा आइजीपी खनालले जुन नांगो नाच नाचेका छन्, त्यसले उनी पदमा बहाल भएको ६ महिनाभित्रै अख्तियार दुरुपयोग अनुसन्धान आयोगको छानबिनमा पर्ने संभावना बढेको छ ।
सशस्त्र प्रहरी बलको बलम्बुस्थित अस्पतालका लागि १० आना जग्गा १० करोड रुपैयाँमै खरिद गर्ने क्रममा आइजीपी खनालले नांगो भ्रष्टाचार गरेका छन् ।
बलम्बुस्थित अस्पतालसँगै जोडिएको सशस्त्रका पूर्व एसएसपीको ४ आना र बहालवाला इन्स्पेक्टरको ६ आनासमेत गरी १० आना जग्गा खरिद गर्दा सशस्त्रले टेण्डरसमेत नगरेको खुलासा भएको छ ।
सार्वजनिक खरिद ऐन नियममा टेण्डर गरेर मात्र खरिद गर्नुपर्ने ब्यवस्था छ । तर अस्पताल वरिपरि १ दिन भित्तामा जग्गा आवश्यक परेको सूचना निकाली गुपचुप रुपमा खरिद गरिएको थियो ।
सशस्त्रको कल्याणकारी सेवा केन्द्रका लेखाअधिकृत इन्स्पेक्टर महेन्द्र हमालको ६ आना र सशस्त्रकै पूर्वएसएसपी लक्ष्मी बस्यालको ४ आना जग्गा सशस्त्रले १० करोडमा खरिद गरेको हो । हमालको साढे ४ तला घरसमेत थियो । बस्यालको जग्गा खाली थियो ।
खरिद प्रक्रिया सबै उल्लंघन गरी जग्गा किन्ने क्रममा सशस्त्रका आइजीपी शैलेन्द्र खनालले ४ करोड रुपैयाँ भन्दा बढी घोटाला गरेको आरोप छ । सशस्त्र प्रहरीको अस्पताल रहेको क्षेत्रमा जग्गाको मूल्य प्रतिआना न्यूनतम २५ देखि बढीमा ३५ लाख रुपैयाँसम्म पर्छ । बढीमा ५० लाख आना हुँदा पनि ५ करोड हुन्छ ।
जग्गाको सबैभन्दा बढी मूल्य तिरेर भूकम्पले चिराचिरा पारेको र पछि टालटुल पारेको पुरानो घरको थप १ करोड दिंदा पनि ६ करोड भन्दा पर्दै नपर्ने जग्गा सशस्त्र प्रहरीले १० करोडमा खरिद गर्दा ४ करोड रुपैयाँ घोटाला भएको सशस्त्रका अधिकारी बताउँछन् ।
कैलालीमा तालिम केन्द्र बनाउनका लागि सरकारले निकासा दिएको १० करोड रुपैयाँ बजेट त्यहाँ खर्च नगरी आइजीपी खनालले अस्पतालको जग्गा खरिद गरेको खुलेको छ । सिंहबहादुर श्रेष्ठ आइजीपी हुँदा पनि सशस्त्रको जग्गा खरिद गर्नका लागि कुरा उठेको थियो ।
श्रेष्ठले अस्पतालका तत्कालीन सुपरिटेन्डेन्ट प्राविधिक एसपी रुपम महर्जनलाई जग्गा आवश्यक पर्ने नपर्नेबारे बुझे । महर्जनले सशस्त्र प्रहरी अस्पतालका लागि पर्याप्त जग्गा भएकाले थप जग्गा आवश्यक नपर्ने जवाफ आइजीपी श्रेष्ठलाई दिएका थिए ।
पर्याप्त जग्गा अस्पतालका लागि भएकाले श्रेष्ठले जग्गा खरिद गरेनन् । तर खनाल आउनासाथ ४ करोड भन्दा बढी कमिसन आउने भएपछि अस्पतालका प्राविधिक एसपी महर्जनलाई हटाएर प्रशासनतर्फका एसएसपी हरिश्चन्द्र अधिकारीलाई सरुवा गरे । महर्जनबाट जग्गा खरिद गर्न सकारात्मक कुरा नआउने भएपछि उनले २०७५ जेठ १२ मा एसएसपी अधिकारीलाई सरुवा गरेका थिए ।
सशस्त्रको इतिहासमा अस्पतालमा प्राविधिक नै प्रमुख हुँदैआएका थिए । तर पहिलो पटक आइजीपी खनालले उक्त जग्गा खरिद गर्नकै लागि प्रशासनका एसएसपीलाई अस्पतालको प्रमुखमा पठाएर उनीबाट जग्गा र घर आवश्यक भएको राय लेख्न लगाए । र, भूकम्पले चिराचिरा पारेको घर सशस्त्रको लागि आवश्यक परेको भनी किनेका छन् ।
जुन घर साह्रै पुरानो हो, आजको साँघु साप्ताहिकमा समाचार छ । भूकम्पमा कामै नलाग्नेगरी छियाछिया भएको थियो । कल्याणकारी सेवा केन्द्रका लेखाअधिकृत हमालले नै भूकम्पले जर्जर बनाएको घर र जग्गा खरिदमा कमिसनको डिल गरेका थिए ।
जग्गा खरिदमा घुसको सेटिङ सबै सशस्त्र मुख्यालयका लेखा अधिकृत गणेशबहादुर मल्ल र अस्पतालका एसएसपी अधिकारीले गरेका थिए । मल्लले घुसमा कुरा मिलाइसकेपछि सशस्त्रका आइजीपीले जग्गा खरिदको स्वीकृति दिएका थिए ।
मल्ललाई खनाल आइजीपी हुनासाथ लेखामा ल्याएका हुन् । उनले आफ्नो घर नै बिक्री गरी खनाललाई आइजीपी बनाउन शक्तिकेन्द्रमा लगानी गरेकाले केन्द्रीय लेखामा आउन सफल भएको निकटस्थहरुसँग बताउने गरेका छन् ।नयाँपेजबाट
