यी हुन् भेडाको कथा सुनाउँदै समय कटाउने नेकपाका सांसद
आइतबार बसेको राष्ट्रियसभा बैठकमा अरिङ्गालको नाम लिँदै भेडाको कथा सुन्न पाइयो । पछिल्लो समय प्रधानमन्त्री केपी शर्मा ओलीले सरकारको आलोचना गर्नेमाथि अरिङ्गाल जस्तै आक्रमण गर्न आफ्ना कार्यकर्तालाई दिएको निर्देशनपछि अरिङ्गालको खुबै चर्चा गर्ने गरेको छ ।
आइतबार बसेको राष्ट्रियसभाको बैठकमा समेत अरिङ्गालको नाम सुन्न पाइयो । ओलीकै पार्टी नेकपाका सांसद रामनारायण बिडारीले अरिङ्गाल नाम लिँदै भेडाको कथा सुनाए ।
बिडारीले संविधानलाई जलाउने, ढुंगाले हान्नेविरुद्ध जनता अरिङ्गाल भएर जाइलाग्ने बताए । अरिङ्गाललाई ढुंगाले हान्यो भने एकैचोटि हमला गर्ने भन्दै बिडारीले संविधानलाई जलाउने, ढुंगाले हान्ने काम भयो भने जनता अरिङ्गाल भएर आउने बताए ।
भेडाको प्रसंगमा उनले भेडाको खुट्टा काट्यो भने नकराउने । तर, उफ्रिने र छटपटिने भेडाको स्वभाव रहेको भन्दै उसको अगाडि लौरो तेर्स्यायो भने बुर्लुक्क उफ्रिएर लौरो नाघेर जाने बताए ।
अनि लौरो थुतिदियो भने त्यो भन्दा पछाडिको भेडो पनि त्यसैगरी उफ्रिएर जाने तर, त्यहाँँ लौरो नहुने भन्दै बिडारीले आफुहरुले आफ्नो कार्यकर्ता भेडा जस्तो बनाउन नचाहेको बताए । आफुहरुले अरिङ्गाल र मौरी जस्तो पार्टी बनाउन चाहेको भन्दै आइलाग्नेमाथि जाइलाग्ने नीति आफुहरुको हुने बताए ।
