विप्लव माओवादीका रोल्पा सेक्रेटरी पक्राउ, वार्तामा पनि बोलाउँदै पक्राउ पनि गर्दै सरकार
सरकारले नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टीलाई वार्तामा बोलाउनुका साथै कार्यकर्ता धरपकडलाई पनि जारी राखेको छ ।
प्रहरीले विप्लव माओवादीका रोल्पा जिल्ला सेक्रेटरी सन्तोष सुवेदी ‘प्रयास’ लाई पनि पक्राउ गरेको छ । सेक्रेटरी प्रयासलाई रोल्पा नगरपालिका–१० धवाङबाट प्रहरीले सोमबार बेलुका पक्राउ गरेको हो ।
पक्राउ परेका प्रयासलाई जिल्ला प्रहरी कार्यालय लिबाङ ल्याइएको रोल्पा प्रहरी प्रमुख प्रहरी नायव उपरीक्षक दिपक खडकाले जानकारी दिएका छन् । गाउँमा लुकिछिपी बसेको अवस्थामा उनलाई पक्राउ गरिएको प्रहरीले जनाएको छ ।
नेकपाका कार्यकर्ताले भने गाउँमा जनजागरण अभियानमा रहेका नेता प्रयासलाई पक्राउ गरेको जनाएका छन् । केहि समय अगाडि नेकपाका प्रवक्ता खड्गबहादुर विश्वकर्मा ‘प्रकाण्ड’ पक्राउ परेपछि प्रयासलगायत नेता सदरमुकाम लिबाङबाट गाउँतिर गएका थिए ।
नेता प्रयासलाई केहि दिन अगाडि रोल्पाकै गंगादेव गाउँपालिकामा स्थानीय युवालाई कुटपिट गरेको आरोपमा पक्राउ गरिएको रोल्पा प्रहरी प्रमुख डिएसपी खड्काले बताएका छन् । उनका अनुसार संघीय र प्रदेश चुनावताकाको विष्फोटनका घटनामा संलग्न रहेको आरोप पनि छ । चुनावका बेला जिल्लाका दर्जनौ स्थानमा विष्फोट भएका थिए ।
चुनावी अवधिमा सेक्रेटरी प्रयासलगायतका नेतालाई प्रहरी हिरासतमै राखिएको थियो । उनलाई मंगलबार नै अदालतमा उपस्थित गराइने जनाइएको छ । रोल्पा विप्लव माओवादीको गढकै रुपमा चिनिने गर्छ ।
