नेपाल–चीन सम्वन्ध नयाँ उचाईमा : नेता भट्टराई
नेकपा सांसद योगेश भट्टराईले नेपाल र चीनबीच भएको पारवहन तथा यातायात सम्झौता सम्वन्धि प्रोटोकलले नेपालको कूटनीतिक सम्वन्धलाई नयाँ उचाईमा पुर्याएको बताउनुभएको छ ।
प्रतिनिधिसभाको आजको बैठकको विशेष समयमा बोल्दै भट्टराईले पारवहन तथा यातायात सम्झौतासम्बन्धी प्रोटोकलले नेपाली अर्थतन्त्रलाई माथि उठाउने विश्वास व्यक्त गर्नुभयो ।
प्रधानमन्त्री केपी शर्मा ओलीले २०७२ चैतमा गरेको चीनको भ्रमणमा नेपाल र चीनबीच ऐतिहासिक पारवहन तथा यातायात सम्झौता भएको थियो । उक्त सम्झौता अव पूर्ण कार्यान्वयनमा आउनेछ । अघिल्लो साता दुई देशबीच त्यसको प्रोटोकलमा पनि सहमति भएको छ ।
‘नेपाल र चीन बीचका ६ वटा नाकामार्फत् आगामी दिनमा नेपालको व्यापार सहज हुनेछ । यसले कुटनीतिक सम्बन्धलाई पनि नयाँ उचाइमा पु¥याउनेछ’ उहाँले भन्नुभयो ।
सांसद प्रेम सुवालले नेपाल मेडिकल काउन्सिलको कामलाई पारदर्शी बनाउन माग गर्नुभयो । सांसद छक्कबहादुर लामाले शिक्षक सेवा आयोगको परीक्षा केन्द्र हुम्लाको सिमिकोटमा सञ्चालन गर्न माग गर्नुभयो ।
सांसद मैनाकुमारी भण्डारीले हालैको वर्षात्को बाढी र पहिरोले बागलुङ जिल्लाका विभिन्न स्थानामा क्षति पुगेकाले तत्काल जोखिममा रहेका बस्ती सार्न सरकारको ध्यानाकर्षण गराउनुभयो ।
सांसद दुर्गा पौडेललले बलात्कारपछि हत्या गरिएकी निर्मला पन्तको हत्यारा छिटो सार्वजानिक गर्न सरकारको ध्यानाकर्षण गराउनुभयो ।
