निर्मलाको न्यायका लागि नेपालगञ्जमा आन्दोलन, जिल्ला प्रशासन कार्यालय घेराउ
निर्मलाको हत्यारालाई कारबाहीको माग गर्दै नेपालगञ्जमा सिटी फुकिएको छ । जिल्ला प्रशासन कार्यालय, नेपालगञ्ज अगाडि पाँच मिनेट सिटी फुकेर सरकारको ध्यानाकर्षण गराइएको हो । स्वस्फूर्त रुपमा जम्मा भएको मूहले जिल्ला प्रशासन कार्यालयको प्रवेशद्वार अगाडि उभिएर सिटी फुकेको थियो ।
सरकारले कानमा तेल हालेर बसेकाले ब्यूँझाउनका लागि सिटी फुकिएको अभियान्ताहरुले बताए । कञ्चनपुरकी १३ वर्षीया निर्मला पन्तको बलात्कार र हत्याको दोषीलाई ५३ दिनसम्म पत्ता लगाउन नसकेको भन्दै अभियान्ताहरुले सिटी फुकेर सरकारलाई ब्यूँझाएका हुन् ।
नेपालगञ्ज उद्योग बाणिज्य संघका अध्यक्ष नन्दलाल बैश्यले निर्मलाको हत्यारा पत्ता लगाउन नसक्दा सरकारको मात्रै होइन, देशकै बेइज्जत भइरहेको बताए ।
‘हाम्रा चेलीहरु असुरक्षित छैनन्, अपराध गर्नेलाई पनि सरकारले कारबाही गर्न सक्दैन, अध्यक्ष बैश्यले थपे, यो घटनाले देशकै बेइज्जत भइरहेको छ । सरकार भने कानमा तेल हालेर बसेको छ ।’
उनले छिटो भन्दा छिटो हत्यारा पत्ता लगाएर कारबाही नगरे आन्दोलनलाई सशक्त बनाउने चेतावनी दिए ।
सरकारले ‘समृद्ध नेपाल, सुखी नेपाली’को नारा अघि सारेको छ । नानीहरु असुरक्षित रहने देशका जनता कसरी समृद्ध र सुखी हुन सक्छ ? अभियान्ताहरुले प्रश्न गरेका छन् ।
कञ्चनपुरसँगै बाँकेको कोहलपुरको घटनालाई पनि जोडिन थालिएको छ । ७८ वर्षका हजुरबाले १३ वर्षकी नातिनीलाई तीन वर्षदेखि गरेको जबरजस्तीलाई प्रहरीले कमजोर बनाउन थालेको आरोप लगाइएको छ ।
प्रहरीले अहिलेसम्म अभियुक्तलाई बाहिर ल्याएको छैन । बाँकेमै यो बीचमा तीन वटा बलात्कारका घटना भएका छन् ।
‘निर्मलाका निम्ति न्याय’ को आन्दोलनलाई निरन्तरता दिइएको छ । आँखामा कालो पट्टी बाँधेर शनिबारदेखि शुरु भएको आन्दोलनलाई सिटी फुक्नेदेखि अबको दुई दिन सबै अभियान्ताले आफ्नो फेसबुक वालमा निर्मलाको न्यायका निम्ति केही न केही लेख्न भनिएको छ ।
वाललाई कालो पोतेर विरोध जनाउने सार्वजनिक रुपमा अपिल गरिएको छ । दुई दिन यसो गरेपछि नयाँ चरणका आन्दोलन थालिने अभियान्ताहरुले बताएका छन् ।
