राष्ट्र बैंक तोडफोड गर्न खोज्ने १३ विद्यार्थी प्रहरीको खोरमा
धनुषाको जनकपुरस्थित राष्ट्रबैंकको कार्यालयमा तालाबन्दी गर्न पुरेका समाजवादी विद्यार्थी फोरमका १३ जना कार्यकर्ता पक्राउ परेका छन् ।
प्रदेश २ सरकारको निर्देशन अवज्ञा गरेको भन्दै तालाबन्दी गर्न पुगेका संघीय समाजवादी फोरम निकट विद्यार्थी संगठन समाजवादी फोरमका कार्यकर्तालाई प्रहरीले पक्राउ गरेको हो ।
प्रदेश २ सरकारको आन्तरिक मामिला तथा कानून मन्त्रालयले, आईबार कृष्ण अष्टमीका लागि सार्वजनिक विदा दिने निर्णय सहित कार्यालय नखुलाउन सबै कार्यालयलाई परिपत्र समेत गरेको थियो ।
तर, राष्ट्रबैंकले कार्यालय खोलेपछि उपप्रधानमन्त्री एवं स्वास्थ्य मन्त्री उपेन्द्र यादवको संघीय समाजबादी फोरम निकट समाजबादी विद्यार्थी फोरमका सचिवायलय सदस्य शत्रुघन यादव सहित १३ विद्यार्थी तालबान्दी गर्न पुगेको बेला पक्राउ परेका हुन् ।
यसअघि रक्षा बन्धनको दिन पनि, प्रदेश सरकारको निर्णय अवज्ञा गरेको भन्दै प्रदेश २ का आन्तरिक मामिला तथा कानूनमन्त्री ज्ञानेन्द्रकुमार यादवले जनकपुरस्थित नेपाल राष्ट्र बैंकको कार्यालयमा तालाबन्दी गरेका थिए ।
प्रदेश सरकारले यसअघि बिदा दिँदै आए पनि, सङ्घीय सरकार मातहतका कार्यालयले अवज्ञा गर्दै आएका छन् ।
धनुषाका प्रमुख जिल्ला अधिकारी प्रेमलाल लामिछानेले भने, कार्यालयको भौतिक सम्पत्ति क्षति हुन नदिन केहीलाई नियन्त्रणमा लिइएको जानकारी दिएका छन् ।
धनुुषाको जिल्ला प्रशासन कार्यालय पनि खुलेको छ । तर, अहिलेसम्म एकजना सेवाग्राही पनि कार्यलयमा सेवा लिन आएको लामिछानेले जानकारी दिएका छन् ।
