नेपालको लगातार दोस्रो जित, सिंगापुर ४ विकेटले पराजित
एसिया कप क्रिकेटको छनौट खेलमा नेपालले लगातार दोस्रो जित निकालेको छ । प्रतियोगिताको चौथो खेलमा नेपालले सिंगापुरलाई ४ विकेटले पराजित गरको हो ।
टस जितेर ब्याटिङ रोजेको सिंगापुर ४२ ओभरमा सबै विकेट गुमाउँदै १ सय ५१ रनमा अलआउट भएको थियो । १ सय ५२ रनको विजय लक्ष्य पछएको नेपालले २८ दशमलव १ ओभरमा ६ विकेट गुमाएर लक्ष्य भेट्टाएको हो ।
नेपालको जितमा आरिफ शेखले ४३ रनको योगदान गरे । यस्तै, दिपेन्द्रसिह एैरीले ३३, ज्ञानेन्द्र मल्लले २९, सागर पुन र सुवास खकुरेलले समान १४ रन बनाए । यसअघि टस जितेर पहिला ब्याटिङ गरेको सिंगापुर ४२ औं ओभरमा अल आउट हुदै १५१ रनमा अल आउट भयो ।
सिंगापुरलाई सस्तैमा समेट्ने क्रममा सन्दिप लामिछाने, ललित राजवंशीले तीन तीन विकेट लिएका छन् । यस्तै सोमपाल कामीले दुई विकेट लिदा अन्तिम विकेट भने बसन्त रेग्मीको नाममा रह्यो । ललितले ९ ओभरमा एक मेडन राखेर २७ रन खर्चिएका थिए भने सन्दिपले १० ओभरमा ३५ रन खर्चेका थिए ।
सिंगापुरका लागि भने चेतन सुर्यवंशीले ६० रनको योगदान दिए । अन्य ब्याट्सम्यानले खासै राम्रो प्रर्दशन गर्न नसक्दा सिंगापुर सस्तैमा समेटिएको हो । पहिलो दुई खेल हारेको नेपालले हिजो भएको खेलमा आयोजक मलेसियालाई १९ रनले पराजित गरेको थियो ।
