कर्मचारीमाथि कडा निगरानी राख्न अनुसन्धान शाखा स्थापना
कार्यालय समयमा कर्मचारीहरुले मन लगाएर काम नगर्ने र कार्यालयको काम भन्दा अन्य कुरामा बढी भुलिने गरेको गुनासो नागरिकले गर्ने गरेका छन् ।
यसै गुनासोलाई सम्वोधन गर्न र भन्सार छलीमा सघाउने कर्मचारीहरुविरुद्ध मुद्दा दायर हुन थालेपछि भन्सार विभागले आफ्ना कर्मचारीहरुमाथि निगरानी गर्न अनुसन्धान शाखा स्थापना गरेको छ । विभागको नयाँ संरचनाअन्र्तगत सो शाखा स्थापना गरिएको हो ।
भर्खरै मात्र नयाँ शाखा स्थापना गरिएको विभागका नायब महानिर्देशक नारायण सापकोटा बताउँछन् । जसले मातहतका कर्मचारीहरुको निगरानी गर्नुका साथै उजुरी उपर समेत अनुसन्धान गर्नेछ । भन्सार छलीलाई नियन्त्रण गर्न सो शाखा स्थापना गरिएको विभागले जनाएको छ ।
दुई साताअघि मात्र राजश्व अनुसन्धान विभागले नेपालगञ्ज भन्सार कार्यालयका सात कर्मचारीविरुद्ध राजश्व चुहावटको मुद्दा दायर गरेको थियो ।
नक्कली प्रज्ञापनपत्रका आधारमा सामान आयात गर्ने गिरोहसँग मिलेमतो देखिएपछि विभागले मुद्दा दायर गरेको हो । हाल रसुवा तथा वीरगंज भन्सार कार्यालयका कर्मचारीमाथि समेत विभागले अनुसन्धान गरीरहेको छ ।
विभागले राजश्व चुहावट नियन्त्रण ऐनअनुसार कार्बाही गर्न थालेपछि कर्मचारीहरुलाई समेत प्रतिवादी बनाउन थालिएको हो । ऐनमा कर्मचारीको मिलेमतो देखिएकोमा उनीहरुविरुद्ध समेत मुद्दा चलाउन सकिने प्रावधान छ ।
