सरकारसँग वार्ता गर्न विप्लव नेकपाद्वारा ठाडै अस्वीकारः सरकारले दमनको नीति लियो
बिप्लव नेतृत्वको नेपाल कम्यूनिष्ट पार्टीले सरकारसँग वार्ता गर्न अस्वीकार गरेको छ । विना कारण आफ्ना कार्यकर्तालाई पक्राउ गरेको भन्दै आक्रोसित बनेका नेकपाका नेताहरुले सरकारसँगको वार्ता औचित्यहिन भएको बताएका छन् ।
‘सरकारले बाहिर एउटा कुरा गरेको छ भित्र दमनको नीति लिएको छ । हाम्रा थुप्रै साथीहरूलाई विभिन्न अपराधमा जेल हालिरहेको छ तर वार्ताको नाटक पनि मञ्चन गरिहेको छ’ आक्रोसित हुँदै नेकपाको नेता हेमन्तप्रकाश ओलीले भने ‘बाहिर एकथरी र भित्र दमन गर्ने नीति लिने सरकारसँग वार्ताको औचित्य छैन।’
उनले आफ्ना पार्टीका दर्जनौ नेतालाई विभिन्न आरोपमा सरकारले फसाएको बताए । ‘प्रवक्ता प्रकाण्डलाई काठमाडौंदेखि काभ्रे र नुवाकोटका हिरासतमा सरकारले घुमाईरहेको छ’ यस्तो सरकारसँग कसरी वार्ता थाल्ने ?’ उनले भने ।
सरकारले सोमप्रसाद पाण्डेको नेतृत्वमा विभिन्न असन्तुष्ट पक्षसँग वार्ता गर्न शुक्रवार समिति बनाएको छ । वार्ता समितिले तराईसमा पृथकताबादी अभियान थालेका सीके रावतदेखि विप्लव नेतृत्वको नेकपालाई आग्रह गरेको थियो । समितिले आग्रह गरेलगतै नेकपाले यस्तो प्रतिक्रिया दिएको हो ।
