प्रधानमन्त्रीको घोषणा सिलिन्डर बिदाइ कार्यक्रम सुरु भयो
प्रधानमन्त्री केपी शर्मा ओलीले एलीपीजी ग्यास सिलिन्डर विदाइ कार्यक्रम सुरु भएको बताएका छन् । विराटनगर महानगरपालिका(१४ स्थित श्रीकृष्ण गौशालामा गोबर संकलन गरेर उत्पादन गरिएको वायोग्यास उद्घाटन गर्दै प्रधानमन्त्री ओलीले यस्तो बताएका हुन् ।
‘मैले पाइपबाट ग्यास घर घरमा पुर्याउँछौँ भन्दा पत्याएनन्, यहाँ पाइपबाट ग्यास कसरी पुग्छ रु हामी आफैँले चुल्हो चलाएर हेर्यौँ’, प्रम ओलीले भने, ‘अहिले सानो संख्यामा सुरु भए पनि ठुलो संख्यामा पनि यसलाई विस्तार गर्न सकिन्छ ।’
प्रधानमन्त्री ओलीले वायोग्यास उद्घाटनमा बोल्दै अब सिलिन्डर बिदाइ कार्यक्रम सुरु भएको बताए । ‘अब विस्तारै सिलिन्डर विदाइ कार्यक्रम सुरु भएको छ । अब काँधमा सिलिन्डर बोकेर हिँड्नै पर्दैन’, ओलीले भने, ‘वायो ऊर्जालाई गाउँ गाउँमा सहकारी, साझा लगानी र समुदायको पहलमा पनि विकास गर्न सकिन्छ ।
प्रम ओलीले निजी क्षेत्रतर्फ लक्षित गर्दै रोजगारी वृद्धिको पहल गर्न आग्रह गरे । ‘निजी क्षेत्रले उत्पादन, रोजगारी, आत्मनिर्भरता र निर्यातजन्य उत्पादनमा पहल लिएर लगानी गर्ने हो भने आयात प्रतिस्थापन गरेर व्यापार घाटा घटाउन सकिन्छ’, ओलीले सम्बोधनका क्रममा भने ।
प्रम ओलीले ठुला जलविद्युत् आयोजनाहरु धमाधम बनिरहेकाले ग्यास सिलिन्डर विदाइको अवस्था नजिक आएको बताए । ‘ठुला विद्युत् आयोजना क्रमशः बनिरहेका छन् । त्यसको ऊर्जाको प्रयोग पनि बढ्नेछ’, ओलीले भने, ‘यो यात्रा अहिले सानो देखिए पनि यसको ठुलो महत्व छ, यो सुरक्षित पनि छ ।’
प्रम ओलीले सौर्य ऊर्जा पनि क्रमशः सस्तो हुँदै गएकालले ग्यासको विकल्पमा त्यसलाई पनि विस्तारै बढाउँदै लैजान सकिनेमा जोड दिए ।
