नेपालको संसद बढी परम्परावादी र झन्झटिलो भयो : कानूनमन्त्री ढाकाल

 

संसदीय मामिला तथा कानूनमन्त्री भानुभक्त ढकालले संसदको नयाँ अभ्यासलाई सहज बनाउनुपर्ने बताउनुभएको छ । उहाँले नेपालको संसद बढी परम्परावादी र प्रक्रियागत रुपमा झन्झटिलो भएको भन्दै त्यसमा सुधार आवश्यक रहेको बताउनुभयो ।

 

संघीय संसद र प्रदेशसभाका पदाधिकारीबीच संसदीय प्रक्रिया र अनुभवका आदानप्रदान गर्न आयोजित अन्तरक्रिया कार्यक्रममा बोल्दै संसदीय प्रक्रियालाई सहज बनाउनु पर्ने बताउनुभएको हो ।

 

‘हामी संविधानतः व्यवस्थित भएका छौं । तर, व्यवहारिक रुपमा अझै संक्रमणकालमै रहेकाले यसलाई छिटो सहज बनाउन लाग्नुपर्छ’ मन्त्री ढकालले भन्नुभयो ।

 

प्रतिनिधिसभाका सभामुख कृष्णबहादुर महरा र राष्ट्रियसभा अध्यक्ष गणेश तिमिल्सिनाले संघीय संसद र प्रदेशसभाबीच सभा सञ्चालन र प्रक्रियाबारे अनुभव आदानप्रदान तथा कानून निर्माणमा समन्वय गर्नुपर्ने बताउनुभयो ।

 

संघीय संसदअन्तर्गत प्रतिनिधि सभा, राष्ट्रिय सभा र सातवटै प्रदेशसभाका सांसदबीचको अन्तरक्रियाले संविधानतः छुट्टाछुट्टै अधिकारप्राप्त संघ र प्रदेशबीच समन्वय आवश्यक हुने प्रतिनिधि सभाका सभामुख कृष्णबहादुर महराले बताउनुभयो ।

 

संघ र प्रदेशका साझा अधिकार सूचीसम्बन्धी कानून बनाउन दुई तहका सदनको सहकार्य अपरिहार्य भएको महाराले बताउनुभयो । ‘नेपालमा यसअघि एकात्मक शासन व्यवस्था थियो,’ महराले भन्नुभयो, ‘संघीयता नयाँ अनुभव हो । प्रदेशको संरचना पुरै नयाँ छ । त्यसैले हाम्रो अनुभव आदानप्रदान हुन जरुरी छ ।’

 

राष्ट्रिय सभा अध्यक्ष गणेश तिमिल्सिनाले राज्य पुनर्संरचनापछि बनेका तीन तहका सरकारबीच संविधानले परिकल्पना गरेको उद्देश्य पूरा गर्नका लागि कानून, योजनादेखि विकास निमार्णसम्म सहकार्य हुनुपर्ने बताउनुभयो ।

 

‘राज्य पुनर्संरचना भएर तीन तहका संसद र सरकार बनेपछि पहिलोपटक जम्मा भएका छौं,’ उहाँले भन्नुभयो, ‘यो पहिलो भएकाले परिचयात्मक कार्यक्रम हो । अनुभव साटासाट गर्ने एउटा अवसर हो । यसले कानून निर्माणका क्रममा देखिएका चुनौती सामना गर्ने एउटा आधार तयार गर्ने विश्वास लिएको छु ।’

 

पुरानो संसदीय अभ्यास र कानुन निर्माणको जटिलताबारे समेत छलफल हुने भएकाले कार्यक्रम उपलब्धिमूलक हुने अध्यक्ष तिमिल्सिनाले जानकारी दिनुभयो ।

 

उनले आफूहरु संघीय संसदमा रहे पनि कानुन निर्माण र मुलुकले लिएको समाजवादउन्मुख संघीय लोकतान्त्रिक गणतन्त्र प्राप्ति सबैको लक्ष्य भएकाले प्रदेशका समस्या बुझ्न र समाधान गर्न आफूहरु तयार रहेको बताउनुभयो ।

 

संघीय संसद र प्रदेश सभाका पदाधिकारीले आइतबार बेलुका प्रधानमन्त्री र भोलि (सोमबार) राष्ट्रपतिसँग भेटघाट गर्ने कार्यक्रम रहेको छ ।