आफ्नो पार्टीले जितेका स्थानीय तहलाई कर फिर्ता लिन राप्रपाको निर्देशन
देशभर करको विरोध भईरहेका बेला कमल थापा नेतृत्वको राष्ट्रिय प्रजातन्त्र पार्टी राप्रपाले आफ्नो पार्टीबाट जितेका गाउँपालिका, नगरपालिका र उपमहानगरपालिकालाई कर नलगाउन निर्देशन दिने निर्णय गरेको छ ।
केन्द्रीय कार्यसम्पादन समितिको बैठकले ति स्थानीय सरकारले कर लगाएको भए फिर्ता लिन समेत भनेको छ । राप्रपाले नेपालगञ्ज उपमहानगरसहित पाँच स्थानीय तहको प्रमुख नै जितेको थियो । नेपालगञ्ज उपमहानगरमा धवलशमशेर राणा मेयर छन् ।
राप्रपाले झापाको हल्दिवारी, कचनकवल गौरीगञ्ज गाउँपालिकाको प्रमुख जितेको थियो भने, धादिङ्को रुविभ्याली गाउँपालिकाको प्रमुख पनि राप्रपाकै छ । राप्रपाले वाग्लुङ, डोल्पा लगायतका जिल्लामा उपप्रमुख समेत जितेको छ ।
पार्टी अध्यक्ष कमल थापाको अध्यक्षतामा बसेको बैठकले आमजनताको विचमा पर्याप्त बहस नै नगरी जनताको प्रत्यक्ष अभिमतविन ाकायम गरिएको संघीय संरचनाको दुष्प्रभाव र विकृति देखिन थालेको टिप्पणी गरेको छ ।
बैठकले ३ बुँदे निर्णय गर्दै संघीयता कार्यान्वयनका लागि अरबौँ विदेशी ऋण लिनु पर्ने बाध्यता रहेको र अर्कोतर्फ सर्वसाधारणमाथि थोपरिएको करको बोझले नेपाली जनजीवन अस्तव्यस्त र आक्रान्त भएको औँल्याएको छ । स्थानीय तह, प्रदेश र संघीय सरकारबाट लगाईएको दोहोरो तेहरो कर न्यून र निश्चित आय भएका सर्वसाधारण जनतालाई जीवन धान्न कठिन भएकोछ, बैठकको निर्णयमा भनिएको छ, ‘उद्योग वाणिज्य एवं अन्य व्यवसाय र पेशागत क्षेत्रहरुमा समेत नकारात्मक प्रभाव पारेको छ । त्यसर्थ, अव्यवहारिक र जनतालाई कष्ट पर्ने कर तत्काल खारेज गर्न राप्रपा सरकारसँग माग गर्दछ ।’
बैठकले समान विचारधारा भएका राजनीतिक दलहरुसँग एकता वार्ता भईरहेका बेला राप्रपा प्रजातान्त्रिकका पदाधिकारीबाट हिन्दु्राष्ट्र र राजसंस्थाबारे फरक–फरक धारणा सार्वजनिक रुपमा आईरहेकोबारे ध्यानाकर्षण भएको भनेको छ ।
त्यसबारे उक्त पार्टीका शीर्ष नेतासँग कुरा गरी हिन्दुराष्ट्र र राजसंस्थाबारे आधिकारिक धारणा बुझ्न उपाध्यक्ष बुद्धिमान तामाङको संयोजकत्वमा गठित वार्ता टोलीलाई बैठकले निर्देशन दिने निर्णय गरेको पार्टी प्रवक्ता भुवन पाठकले बताए ।