प्यारामोटर उडाउने सरोज चेपाङलाई राष्ट्रिय युवा प्रतिभा पुरस्कार
प्यारा मोटर निर्माण गरेर सफल परीक्षणसमेत गरेका चितवन राप्ती नगरपालिका(२ गड्यौलीका सरोज चेपाङलाई नेपाल सरकार युवा तथा खेलकुद मन्त्रालय र राष्ट्रिय युवा परिषदले सम्मान गरेको छ ।
युवा तथा खेलकुद मन्त्रालयले आइतबार अन्तर्राष्ट्रिय युवा दिवसको अवसरमा २१ वषिर्य सरोजलाई युवा प्रतिभाबाट सम्मान गरेको हो ।
सम्मानसँगै उनले नगद १ लाख रुपैयाँसमेत प्राप्त गरेका छन् । काठमाडौंमा भएको कार्यक्रममा उपप्रधान तथा रक्षामन्त्री इश्वर पोखरेल र युवा तथा खेलकुद मन्त्री जगतवहादुर विश्वकर्माले सम्मान पत्र र १ लाखको चेक प्रदान गर्दै सम्मान गरे ।
विज्ञान तथा प्रविधिको क्षेत्रमा सामान्य परिवारका सरोजले गरेको योगदानको मूल्याङकन गर्दै मन्त्रालयले सम्मान गरेको हो ।
आगामी दिनमा आविस्कारको क्षेत्रमा प्रोत्साहन गर्न आफुलाई युवा तथा खेलकुद मन्त्रालयले सम्मान गरेको काठमाडौमा रहेका सरोजले जानकारी दिए ।
सरोजले आफ्नै लगानीमा गत चैंत्रमा प्यारा मोटर निर्माण गरेर सफल परीक्षण गरेका थिए । उनी अहिले मिनी एयरक्राफ्ट (सानो जहाज) समेत निर्माण गरिरहेका छन् ।
सानो जहाजका लागि आवश्यक इन्जिन नभएपछि उनले एयर बोट निर्माणको काम पनि थालेका छन् । एयरबोटको काम अन्तिम चरणमा पुगिसकेको छ । सो एयरबोट नारायणी नदीमा परीक्षण गर्ने सरोजको योजना छ ।
