काठमाडौंबाट फेरि अर्को ९ वर्षीय बालकको अपहरण
काठमाडौंको गंगबुबाट एक जना बालक बेपत्ता भएका छन् ।
आइतबार तनहुको शुक्लागण्डकी नगरपालिकाबाट काठमाडौं आएका सीता महतका ९ वर्षीय छोरा सिजान्त महत बेपत्ता भएका हुन् ।
सोमबार विहान काठमाडौं आइपुगेका बालककी आमाले प्रहरीमा दिएको उजुरी अनुसार तनहुबाट काठमाडौं आइपुगे लगत्तै उनको छोरा ‘अपहरण’ मा परेका हुन् ।
तनहुबाट सोही गाडीको एकै सीटमा बसेका आएका दिलबहादुर कार्कीले छोरा सिजान्तलाई अपहरण गरेको भन्दै उनकी आमा सीताले प्रहरीमा जाहेरी हालेकी छिन् ।
एउटै सिटमा बसेका मेडिकल कलेजमा काम गर्छु भन्ने दिलबहादुर कार्कीसँग चिनजान भएको उनको भनाइ छ ।
काठमाडौंमा उत्रिएसँगै गाडीमा चिनजान भएका कार्कीलाई छोरा सिजान्त, झोला जिम्मलगाएर शौचालय गएकी सीता फर्केर आउँदा छोरा थिएनन् भने उनको झोला, मोबाइलसमेत लिएर कार्की त्यहाँबाट हिडेको उनले प्रहरीलाई दिएको उजुरीमा उल्लेख गरेकी छिन् ।
प्रहरीले घटनाबारे छानवीन गरिरहेको जनाएको छ ।