ऐतिहासिक क्रिकेट खेलेर फर्कियो नेपाली टोली, आज यसरी हुँदैछ स्वागत
नेपाललाई एकदिवसीय क्रिकेटमा ऐतिहासिक जीत दिलाएर नेपाली क्रिकेट टोली नेपाल फर्किएको छ ।
नेपाललाई एकदिवसीय क्रिकेटमा ऐतिहासिक जीत दिलाएर फर्किएको नेपाली क्रिकेट टोलीलाई आज शहर परिक्रमा गराएर भव्य स्वागत गर्ने कार्यक्रम छ ।
एकदिवसीय मान्यता प्राप्त गरेपछि नेदरल्याण्डस्लाई पराजित गर्दै नेपालले एकदिवसीय क्रिकेटमा पहिलो जीत हासिल गरेको थियो ।
रोमाञ्चक रुपमा खेल जितेर कार्डियाक किड्सको उपमा पाएको नेपालले दोस्रो एकदिवसीय खेलमा १ रनको जीत हासिल गर्न सफल रहेको थियो ।
टस जितेर पहिलो ब्याटिङ गरेको नेपालले ४८.५ ओभरमा अलआउट हुँदै २ सय १६ रन बनायो ।
जीतका लागि २ सय १७ रनको लक्ष्य पाएको नेदरल्याण्डले अन्तिम ओभरको अन्तिम बलमा अलआउट हुँदै मात्र २१५ रन बनायो ।
अन्तिम बलमा जीतका लागि २ रन आवश्यक भएको अवस्थामा फ्रेड क्लासनलाई कप्तान पारसले रनआउट गरेपछि नेपालले नयाँ इतिहास रच्न सफल भयो ।
सोमबार बिहान त्रिभुवन अन्तर्राष्ट्रिय विमानस्थलमा फ्यानहरु नेपाली क्रिकेटका हिरोहरुसँग फोटो खिचाउन व्यस्त देखिन्थे ।
