एकै परिवारका ७ जनाले गरे आत्महत्या, यस्तो छ कारण
दिल्लीको बुराडीमा एकै परिवारका ११ जनाले सामूहिक आत्महत्या गरेको घटना सेलाउन नपाउदै भारतमा फेरि अर्काे यस्तै घटना दोहोरिएको छ ।
केहि हप्ताअघि बुराडीमा भएको घटनाको अनुसन्धान चलिरहेका बेला राँचीमा पनि एकै परिवारका ७ जनाले आत्महत्या गरेका छन् । प्राप्त खबरका अनुसार मृतक परिवार ऋणमा डुबेको थियो ।
आत्महत्या गर्नेमा २ जना साना बालबालिका छन् । एउटा बालिका ४ वर्षकी छन् भने बालक एक वर्षका मात्रै छन् । घटनाको स्थानीय प्रहरीले अनुसन्धान गरिरहेको छ । अहिले शवहरुकोे पोष्टमार्टम गर्ने तयारी भैरहेको छ ।
कोठामा एक व्यक्ति झुण्डिएको अवस्थामा देखिएका छन् भने बाँकी ६ जनाको शव ओछ्यानमा ढलेको अवस्थामा फेला परेको छ। उनीहरु सबै उक्त घरमा कोठा भाडामा लिएर बसिरहेका थिए।
घर मालिकका अनुसार मृतक भागलपुर भन्ने ठाँउका दीपक झा र उनको परिवार ऋणमा डुबेको थियो र उनीहरुले केहि महिना अघिदेखी कोठाभाडा बापतको रकम समेत तिर्न सकेका थिएनन् ।
उनीहरु मृत भेटिएको खबर त्यतीबेला मात्रै थाहा भएको थियो जतिबेला दीपकको छोरीलाई विद्यालय लैजाने भ्यान आएको थियो । विद्यालय भ्यानका चालकले लामो समयसम्म हर्न बजाउदा पनि कोहि आएनन्।
त्यसपछि घरमालिकका छोरा दीपकको छोरीलाई बोलाउन गए र उनले कोठामा जे देखे त्यो आफ्नो बुवालाई भने। त्यसपछि मात्रै प्रहरीलाई खबर भएको थियो।
