डेन्जर जोनमा परेका लालबाबुलाई अर्को झट्का, गैरआवासीय नेपालीले मागे राजीनामा
कर्मचारीको व्यवस्थापन गर्न नसकेर डेन्जर जोनमा परेका संघीय मामिला तथा सामान्य प्रशासन मन्त्री लालबाबु पण्डितलाई अर्को झट्का लागेको छ । गैरआवासीय नेपालीले मन्त्रि पण्डितको राजीनामा पनि मागेका छ ।
मन्त्रि पण्डितले गैरआवासीय नेपालीप्रति देखाएको व्यवहार ठिक नभएको पुष्टि भएको छ । परराष्ट्रमन्त्री प्रदीप ज्ञवालीले युरोपमा एनआरएनएको क्षेत्रीय वैठकलाई सम्बोधन गर्दै सरकारको तर्फबाट माफी मागेसँगै मन्त्रिपण्डितलाई झट्का लागेको हो । लग्जेम्बर्गमा आयोजित कार्यक्रममा मन्त्री ज्ञवालीले पण्डितले विदेशमा बस्ने नेपालीप्रति गरेको व्यवहारप्रति क्षमा मागेका छन् ।
उनले भने, ‘गैर आवासीय नेपालीको भूमिका र पहिचान संविधानतः व्यवस्था गरिएको छ । राज्यको निर्देशक सिन्द्धान्तमा निकै लामो छलफलपछि यो प्रावधान राखिएको हो । संविधानले प्रत्याभूत गरेको व्यवस्था कटौती हुन्छकी भन्ने चिन्ताबाट मुक्त हुन तपाईहरुलाई अनुरोध गर्दछु ।’
उनले कसैको नाम नलिई घुमाउरो भाषामा भने, ‘व्यक्तिगत रुपमा कोही जिम्मेवार साथीहरुको भनाईबाट तपाईहरुको चित्त दुखेको छ भने म सरी भन्न चाहन्छु ।’ तर, नेपाल सरकारको आधिकारिक धारणा विकासको साझेदारको रुपमा तपाईहरुलाई अघि बढाउने हो, तपाईहरु हर हमेसा चाहिन्छ, भन्ने हो ।
मन्त्री पण्डित अघिल्लो पटक मन्त्री हुँदा ग्रिनकार्ड र पिआरधारीहरु गैरआवासीय नेपालीलाई निकै चोट पुग्ने गरेर अभिव्यक्ति दिन्थे । उनले ग्रिनकार्ड र पिआरधारीहरु कहिल्यै नेपाली हुन नसक्ने र उनीहरुलाई नेपालको बारेमा बोल्ने तथा सोच्ने अधिकार नभएको तर्क गर्दै आएका छन् ।
उनीबाट निकै अपेक्षा गरेको भएपनि अहिले उनले काम गर्न नसकेको भन्दै सरकारभित्रै आलोचना भईरहेको छ । उनलाई सरकारले डेन्जर जोनमा राखेको खबर समेत आएको छ । उनले कर्मचारीको सरुवा, बढुवा र व्यवस्थापन समेत गर्न नसकेकोप्रति प्रधानमन्त्री केपी शर्मा ओली रुष्ट छन् ।
यस्तै, मन्त्री पण्डितले प्रशासन सुधारमा ध्यान नदिएको र मन्त्रालयको काममा भन्दा जिल्ला भ्रमणमा केन्द्रित भएको आरोप छ । सरुवामा आर्थिक लेनदेनको आरोप लागेपछि उनले स्वकीय सचिव ओसिम आलमलाई जिम्मेवारीबाट हटाए । तर, उनको व्यक्तिगत अंकमा भने पटक्कै सुधार आएन ।